Tashmë është zyrtare. Amir Rrahmani ka kryer transferimin nga RNK Split te Dinamo e Zagrebit. Vetë qendërmbrojtësi 23-vjeçar, i cili la kombëtaren kuqezi për atë kosovare, ka njoftuar përmes faqes në Facebook mbarimit e këtij operacioni, që i ka kushtuar 1.5 milionë euro klubit më të madh të futbollit në Ballkan. Merret vesh se një ish-futbollist i kombëtares kuqezi, tashmë në rolin e menaxherit të futbollit, me banim në Zagreb, Ardian Aliji, ka qenë “kumbari” i kësaj lëvizjeje të madhe në karrierën e kosovarit.
Rrahmani, në pak kohë kaloi nga Partizani te RNK Split, ku qëndroi vetëm një vit, dhe tashmë e sheh veten te kampionët e shyumëfishtë të Kroacisë, pjesëmarrës në fazën e grupeve të Ligës së Kampioneve. “Nga sot jam futbollist i GNK Dinamo Zagreb, klubit kampion dhe më të madh në Ballkan. Falënderoj publikisht RNK Split për një vit të shkëlqyer, të kaluar aty,” – shkruan Rrahmani, duke e bashkëshoqëruar këtë status edhe me një foto, ku pozon bashkë me Aliajn, me fanellën e skuadrës së tij të re në duar.
