Këtë të martë kryeministri Edi Rama po i përgjigjet pyetjeve të ngritura nga qytetarët në rrjetet sociale, në rubrikën “Sy m’sy”.
Në nisje të komunikimit, Rama foli për hapjen e zyrës së re të Parlamentit Europian në Tiranë, teksa tha se ky është një moment i jashtëzakonshëm.
Ai tha ndër të tjera, se kanë nisur përgatitjet për Samitin e Komunitetit Politik Evropian më 16 Maj.
“Me hapjen e kësaj zyre, BE konfirmon një strategji më të gjerë dhe përcakton Shqipërinë si pikë referimi jashtë perimetrit të saj dhe si vendin që së shpejti do jetë anëtar. Parlamenti Europian ka 3 zyra aktulisht! Sot, Shqipëria dhe Tirana bëhen vendi mikpritës i zyrës së re të PE-së. Një zyrë, me gjasë do e hapë në Moldavi për të mbuluar pjesën në kufi me Rusinë.
Ky është një moment i jashtëzakonshëm, një moment tjetër shumë i mirë për pozicionin tonë ndërkombëtarë, ndërkohë që kemi nisur përgatitjet për samitin e madh më 16 maj, e para samitit BE dhe liderët e BE kanë vendosur të vijnë në 15 maj për një darkë pune këtu me mua dhe liderët e tjerë të rajonit tonë. Pra 15 do të mikpresim liderët e Këshillit Europian dhe më 16 do të vijnë liderët e të gjithë kontinentit, me përjashtim të Rusisë”, tha Rama.
Po ashtu Rama ironizoi opozitën duke thënë se “si ka mundësi që PE hap zyrë në një narko shtet”?
“Parlamenti Evropian po hap zyrën e tij në Shqipëri. Si ka mundësi, Sorosi, në Parlamentin Evropian, që vepron si diversant?! PE me hapjen e zyrës në Shqipëri konfirmon një strategji më të gjerë të BE-së dhe nga ana tjetër përcakton pa diskutim Shqipërinë si një pikë referimi në PE dhe që së shpejti do jetë anëtar i PE. BE po hap disa zyra dhe Shqipëria bëhet vendi mikpritës i zyrës së PE-së në Tiranë”, deklaroi Rama.
