Zv/ministri i Brendshëm, Julian Hodaj, të mërkurën, deklaroi se nuk ekziston një urdhër-arresti për kreun e Bashkisë së Durrësit, Vangjush Dako.
Hodaj u shpreh në studion e emisionit ‘Opinion’ se Policia e Shtetit nuk mund të refuzojë një urdhër-arresti të lëshuar nga Prokuroria dhe t’mos arrestojë kryebashkiakun e Durrësit.
“Ku ndodh që Policia mos t’i bindet urdhërit të Gjykatës”,- tha ai.
Zv/ministri i Brendshëm theksoi se pala tjetër e logjikon gjithë ngjarjen me metrin e vet, pasi çdo njeri përdor një logjikë të caktuar për të gjykuar një ngjarje.
Për të ilustruar me një shembull, ai u kthye vite pas, duke marrë në shqyrtim refuzimin e policisë për të mos ekzekutuar urdhërat e ndalimit të Prokurorisë për disa persona që ishin të përfshirë në ngjarjen e 21 Janarit.
Pesë orë më parë, deputeti i PD-së, Flamur Noka bëri me dije se ka të paktën 24 orë që fletë arresti për Vangjush Dakon është prerë, por ekzekutimi i tij është bllokuar.
Përmes një deklarate për mediat nga selia blu, Noka tha se Prokuroria duhet t’u thotë shqiptarëve pse dhe kush po ndalon arrestimin e “xhuxhit” në bazë të përgjimeve të dosjes 339.
Ai tha se Vangjush Dako është peshku i madh i ‘dosjës 339’ dhe këtë të vërtetë askush nuk mund ta zhbëjë.
“Askush nuk mund ta zhbëjë të vërtetën se kriminelët e Durrësit e të Shijakut kanë blerë vota për pushtetin e Vangjush Dakos dhe Edi Ramës dhe, si shpërblim, kanë marrë leje ndërtimi dhe tendera miliona eurosh”, – tha Noka.
