Zlatan Ibrahimovic ka “goditur” përmes një statusi në rrjetet sociale, duke dashur të evidentojë vlerën si futbollist në funksion të blerjes më të shtrenjtë në histori, që realizoi klubi i tij kësaj vere. Gjiganti suedez, që la PSG-në dhe iu bashkua Jose Mourinhos në “Old Trafford”, ia ka uruar mirëseardhjen Paul Pogba, për të cilin ka javë që flet përditë media botërore, ashtu sikurse po ndodh edhe në ishull, por indirect edhe e ka thumbuar francezin e talentuar. Për kampionin me disa skuadra, në Holandë, Itali, Spanjë dhe Francë, blerja për një shifër rekord e Pogba u realizua falë shitjes së fanellave të tij me “djajtë e kuq”. “Më në fund, bluzat e mia të kanë rikthyer prapa”, – shkruan Ibra në statusin e tij, të shoqëruar me një foto ku është përballë Pogba, që të dy me uniformën e Manchester United.
90 milionë euro fanella – Nëse këto shifra konfirmohen atëherë bëhet fjalë për një arritje historike në biznesin e futbollit. Sipas asaj që shkruan “The Sun”, Manchester United ka shitur aq shumë fanella të Zlatan Ibrahimovic gjatë një jave, sa ka arritur shumën totale 76 milionë paundë, rreth 90 milionë euro. Duke qenë se në dyqanet e Manchester United, fanella e re “Adidas” e Ibrahimovic kushton 105 euro, atëherë për të arritur shifrën e lartpërmendur do të thotë se janë shitur rreth 800 fanella me numrin 9, që klubi ia hoqi Anthony Martial për t’ia dhënë imazhit të ri të marketingut. Lëvizja ka qenë e gjetur, sepse në këtë mënyrë “djajtë” kanë nxjerrë miliona euro, të nevojshme për blerjen e Paul Pogba nga Juventus.
Kur suedezi zbarkoi te Manchester United, Rob Wilson, ekspert finance në universitetin e Sheffield, deklaroi për BBC: “Nuk do të ishte një habi që Ibra të shesë më shumë fanella se Ronaldo apo Messi. Kosto e mungesës në Champions shkon deri në 60 milionë euro, por kjo shumë mund të vijë nga Ibra. Zlatan ka një profil global dhe shumë vetë në Azi e Afrikë do të marrin fanellën e Manchester United me numër 9.” Pra, Ibra ka nxjerrë nga shitja e fanellës së tij pagën e majme (rreth 16 milionë euro në sezon) dhe deficitin nga mungesa e “djajve të kuq” në Champions. Me këto ritme, duket se Manchester United do të jetë ekipi që do të shesë më shumë fanella, sikurse ndodhi me Barcelonën në sezonin e kaluar. Klubi katalanas shiti 3.6 milionë bluza, 600 mijë më shumë se Manchester United.
