Ministri i Brendshëm, Taulant Balla, foli nga Lushnja, ku një zjarr i madh në një qendër tregtare rrezikoi jetën e qytetarëve, me 25 persona që përfunduan në spital me probleme me frymëmarrjen.
“Falë punës së autoriteteve dhe falë Zotit, nuk kanë rrezik për jetën. Ka ende disa vatra më të vogla zjarri në pjesën lindore të ndërtesës, ku po punojnë zjarrfikësit. Po punohet në kushte të vështira dhe në temperaturë shumë të lartë”, tha Balla.
“Pasi zjarri të vihet tërësisht nën kontroll do të shohim kush ishin arsyet e zjarrit. Nuk dua të bëj deklarata hipotetike pa pritur hetimin e plotë dhe shpresoj që në fund mos të kemi asnjë jetë të humbur, shtoi Balla.
Ndërsa ministrja e Shëndetësisë, Albana Koçiu, e cila vizitoi nga afër qytetarët të cilët ishin në pallatin 12-katësh që u përfshi nga flakët në Lushnje, u shpreh se të gjithë janë jashtë rrezikut për jetën dhe se çdo gjë është nën kontroll.
“Sapo kemi vizituar të gjithë qytetarët që iu drejtuan spitalit në Lushnje. Janë të gjithë jashtë rrezikut për jetën falë një pune të ekipit të mjekëve. Çdo gjë është nën kontroll, gjendja paraqitet e qetë, qytetarët kanë marrë mjekimet e nevojshme dhe për momentin nuk kanë asnjë shqetësim. Përpara se të vija në spital kam qenë edhe pranë qendrës tregtare. Situata është nën kontroll. Janë evakuuar të gjithë banorët dhe janë forcat e RENEA-s që po kontrollojnë kat më kat. Nga informacionet që kam, të gjithë janë të evakuuar dhe policia e zjarrfikëset janë aty për të vënë situatën nën kontroll”, u shpreh ministrja.
