Ende nuk dihen cilat kanë qenë shkaqet që çuan në rënien e zjarrit tek Katedralja Notre Dame në Paris. Një fakt i ri i zbuluar është se punëtorët që rregullonin pjesën e sipërme të Katedrales, ku ndodhi edhe zjarri kanë pirë duhan në kantierin e punës.
Kompania përgjegjëse për ndërtimin në pjesën e sipërme të Katedrales ka pranuar se punëtorët e saj kanë pirë duhan në kantierin e punës. Por përfaqësuesit e kësaj kompanie kanë përjashtuar mundësinë se zjarri është shkaktuar nga ky fakt.
Gjithashtu sipas mediave franceze janë gjetur 7 bishta cigaresh aty ku ka ndodhur zjarri.
“Mesa duket ka punëtorë që herë pas here kanë shkelur rregullat, por në asnjë rast shkak i zjarrit nuk mund të jetë bërë një bisht cigareje i fikur keq”, -ka deklaruar zëdhënësi i kompanisë.
Ndërkohë edhe pista tjetër se zjarri është shkaktuar nga motorët elektrikë të ashensorëve është hedhur poshtë, pasi motorët, sipas ekspertëve nuk kanë paraqitur asnjë problem.
“Ata janë larg majës së katedrales dhe tashmë është konfirmuar se zjarri ra në brendësi të ndërtesës”.
Duket se për momentin si pistë për këtë ngjarje ka mbetur ajo e zjarrit të shkaktuar në mënyrë aksidentale, si pasojë e një qarku të shkurtër, ndonëse ende nuk është konfirmuar zyrtarisht./Opinion.al/
