Mbrëmjen e djeshme Maqedonia e Veriut u trondit nga një ngjarje e rëndë.
Një diskotekë në Koçan u përfshi nga flakët.
Për pasojë humbën jetën 59 persona dhe u plagosën 155 të tjerë.
Diskoteka që njihej me emrin “Puls” sipas asaj që u bë e ditur nga autoritetet e mediat lokale nuk kishte licencë për të ushtruar funksionin, për shkak të kushteve të papërshtatshme.
Këtij subjekti i ishte dhënë licenca në vitin 2023 dhe kishte skaduar në Mars të vitit 2024.
Gazetarja e Klan Macedonia, Xhumadije Ibrahimi në një lidhje direkte për emisionin “Rudina” në Tv Klan dha më tepër detaje mbi ngjarjen e rëndë.
Sipas informacioneve të siguruara prej saj deri më tani ekspertizat mjekësore kanë bërë të mundur identifikimin e 35 personave, të cilët i përkasin moshës nga 14 deri në 25 vjeç.
“Deri në këto momente nuk janë identifikuar të gjithë viktimat për shkak se vazhdon të bëhet obduksioni këtu në mjekësinë ligjore në vend. Thuhet që për 35 persona është bërë identifikimi, mirëpo jo për të gjithë të cilët humbën jetën në këtë tragjedi. Siç dihet rasti është shumë i rëndë. Edhe pse në fillim familjarët kundërshtuan që të bëhej obduksioni, tani kërkojnë që të identifikohen të afërmit e tyre që kanë ndërruar jetë në këtë fatkeqësi. Duhet thënë që kufoma më e re është e moshës 14-vjeçare e deri në moshën 24-25 vjeçare. Pra fatkeqësisht bëhet fjalë për të mitur dhe të rinj”,raportoi gazetarja.
Ndërkohë rreth 155 persona arritën që t’u shpëtonin flakëve, por prej tyre 51 për shkak të plagëve të marra janë dërguar jashtë shtetit për të marrë një trajtim mjekësor më të specializuar.
Sipas asaj që raportoi më tej gazetarja, 20 prej të plagosurve që janë dërguar jashtë shtetit ndodhen në një gjendje më të rëndë shëndetësore.
“Të lënduarit që janë në spitalin e Shkupit janë në gjendje më të mirë shëndetësore, gjendja e tyre shëndetësore është e stabilizuar ashtu informoi dhe ministri i Shëndetësisë. Për shkak se kanë lëndime pak më të lehta se sa ata që janë dërguar jashtë vendit. Bëhet fjalë për 51 persona të cilët ndodhen në gjendje më të rëndë shëndetësore dhe janë dërguar për shërim jashtë vendit si në Bullgari, Greqi, Turqi, Serbi e në disa vende të tjera. 20 prej atyre që janë dërguar jashtë vendit thuhet që situata e tyre është më e rënduar”, përfundoi gazetarja./tvklan
