Ministria e Mbrojtjes ka informuar sërish lidhur me situatën e krijuar në vend si pasojë e disa vatrave zjarresh. Mësohet se është bërë e mundur tashmë eleminimi i rrezikut nga zjarret në Dukat dhe Gjirin e Gramës, ndërkohë që është shuar edhe zjarri pranë pikës kufitare Rips në fshatin Livadhja, gjë që parqeste rrezik edhe për banesat.
“Eleminohet rreziku në vatrat e zjarrit në Dukat e Gjirin e Gramës. Po vijon puna për izolimin e plotë të flakëve në të gjithë sipërfaqen e prekur në Gadishullin e Karaburunit, në qarkun e Vlorës. Gjithashtu është shuar zjarri pranë pikës kufitare Rips në fshatin Livadhja, në bashkinë Finiq, duke shmangur rrezikun për banesat”, njoftoi Ministria.
Mësohet se nën kontroll janë edhe zjarret në zonën e Fierit dhe Kepin e Rodonit.
“Zjarri në fshatin Gjorgos, njësia administrative Cakran, bashkia Fier po mbahet nën kontroll, ndërsa ka vijuar puna me helikopterin çek për shuarjen përfundimtare të tij. Në Kepin e Rodonit, në Durrës është raportuar një vatër zjarri, për të cilën po vijon puna për vënien nën kontroll nga forcat në terren. Nuk paraqitet rrezikshmëri. Një vatër zjarri në një sipërfaqe me shkurre dhe ferra është raportuar në malin e Xhyrës, në bashkinë e Librazhdit. Ai po shuhet nga forcat zjarrfikëse të bashkisë”, thuhet në njoftim.
Problematike tashmë paraqitet situata me zjarrin e fshatit Thirrë dhe në majën e Rrunës në Kukës.
“Zjarri në fshatin Thirrë, njësia administrative Fan, bashkia Mirditë ka vijuar të zgjerojë perimetrin, duke shkaktuar tym në të gjithë kodrën. Forcat po punojnë për të ndërprerë vijën e zjarrit në afërsi të rrugëve të fshatit. Ndërkaq është izoluar plotësisht zjarri në fshatin Munellë-Domgjon, bashkia Mirditë. Vijon të paraqitet e vështirë ndërhyrja për shkak të terrenit në Majën e Rrunës, në Kukës, ku forcat po punojnë të për mos lejuar përhapjen e flakëve në zonat e banuara. Nën kontroll mbeten flakët në fshatin Klysyrë të bashkisë Tropojë si dhe në Vermosh të Malësisë së Madhe”, thuhet në njoftimin e ministrisë./Opinion.al
