Këtë vit Shqipëria është përballur me disa vatra të konsiderueshme zjarri në Dhërmi dhe Llogara, të cilat janë vënë në kohë nën kontroll nga autoritetet.
Për të shmangur dëmet edhe më të mëdha në të ardhmen nga zjarri, ministri i Mbrojtjes, Niko Peleshi apelon që qytetarët të tregohen të kujdesshëm, pasi siç thotë ai, një shkëndijë e vogël mund të shkaktojë dëme të pallogaritshme.
Në reagimin e tij në “Facebook”, Peleshi kujton dhe dënimin prej 15 vitesh burg për personat që ndezin qëllimisht zjarre në pyje. Ministri thekson se Forcat e Armatosura dhe Agjencia Mbrojtjes Civile janë në gatishmëri, ndërsa u kërkon qytetarëve që në rast emergjence të kontaktojë menjëherë me autoritetet.
“Shqipëria është futur në stinën e temperaturave shumë larta! Një shkëndijë e vogël mund të shkaktojë dëme të pallogaritshme. Dënimi i zjarrvënies në pyje me deri në 15 vjet burg tregon vendosmërinë e institucioneve tona ndaj këtij veprimi kriminal. Të gjithë bashkë, të angazhuar në luftën kundër zjarrvënies së qëllimshme. Informimi i shpejtë dhe koordinimi i autoriteteve janë thelbësore për të parandaluar katastrofat e mëdha. Forcat e Armatosura dhe Agjencia Mbrojtjes Civile janë gjithmonë në gatishmëri në mbrojtje të jetës, sigurisë dhe pronës të qytetarëve tanë përballë çdo rreziku që mund të shfaqet. Në rast emergjence kontakto:
127
128
129
Ose në numrin e gjelbër të Emergjencave Civile
08000911.
