Spitali i Durrësit është përfshirë nga flakët në orët e para të mëngjesit të sotëm.
Policia bën me dije se zjarri ka rënë 25 minuta pas mesanet në repartin e ortopedisë dhe ka përfshirë kabinat elektrike të pavionit
“Nga veprimet e para hetimore rezulton se shkaku i zjarrit ka ardhur si pasojë e përfshirjes nga zjarri të katër kabinave elektrike të katër kateve, ku zjarri fillimisht ka nisur në katin e parë dhe ka vazhduar deri në katin e katërt”, njofton policia.
Zjarri shkaktoi vetëm dëme materiale por 5 pacientë pësuan asfiksi nga tymi dhe u dërguan në spitalin e traumës në Tiranë, për mjekim të specializuar dhe ndodhen jashtë rrezikut për jetën.
Shërbimet e Policisë, zjarrfikësit dhe personeli kanë bërë të mundur evakuimin e të gjithë pacientëve nga të katër katet e pavijonit duke i transferuar në një pavijon tjetër.
Pas më shumë se 3 orësh zjarrfikësit ja dolën të neutralizonin flakët.
Gjysma e Spitalit të Durrësit ka mbetur pa energji elektrike dhe riparimi i dëmeve kërkon kohë sipas inxhinierit elektrik të spitalit pasi janë përfshirë të katër katet.
Njoftimi i plotë
Më datë 11.01.2020, në orën 00:25, në repartin e ortopedisë në spitalin e Durrësit, ka rënë zjarr, i cili ka përfshirë kabinat elektrike të pavijonit.
Menjëherë kanë shkuar forcat e Policisë dhe zjarrfikësit.
Shërbimet e Policisë, zjarrfikësit dhe personeli kanë bërë të mundur evakuimin e të gjithë pacientëve nga të katër katet e pavijonit duke i transferuar në një pavijon tjetër.
Si pasojë e zjarrit janë asfiksuar 5 pacientë, të cilët janë dërguar në spitalin e traumës në Tiranë, për mjekim të specializuar dhe ndodhen jashtë rrezikut për jetën.
Nga veprimet e para hetimore rezulton se shkaku i zjarrit ka ardhur si pasojë e përfshirjes nga zjarri të katër kabinave elektrike të katër kateve, ku zjarri fillimisht ka nisur në katin e parë dhe ka vazhduar deri në katin e katërt.
Grupi hetimor, nën drejtimin e prokurorisë po vijon punën për zbardhjen e plotë të shkakut të përfshirjes së kabinave elektrike nga zjarri. /Opinion.al
