Një zjarr që u përhap gjatë natës në një garazh parkimi në Aeroportin Luton, aeroporti i katërt më i madh që i shërben Londrës, bëri që aeroporti të pezullojë fluturimet deri në orën 15:00 të së mërkurës.
Mediat e huaja shkruajnë se flakët u shuan të mërkurën në mëngjes, ndërsa pasagjerët u këshilluan të mos udhëtonin në aeroport, tha Shërbimi i Zjarrfikësve dhe Shpëtimit në Bedfordshire. Gjashtë zjarrfikës dhe një qytetar u shtruan në spital për thithjen e tymit, sipas BBC.
Zjarri, i cili filloi të martën në mbrëmje, çoi në një “kolaps të pjesshëm strukturor” në Terminal Car Park 2, sipas operatorit të aeroportit, i cili është një qendër për linjat ajrore buxhetore, duke përfshirë easyJet dhe Ryanair.
Shërbimi i Zjarrfikësve dhe Shpëtimit në Bedfordshire tha se fillimisht mori thirrje për zjarrin pak para orës 21:00.
Menjëherë më pas u vendosën 15 kamionë zjarrfikës dhe më shumë se 100 zjarrfikës për të neutralizuar flakët, intensiteti i të cilave u rrit shpejt. Deri në 1200 automjete vlerësohet të jenë dëmtuar në garazhin e parkimit.
