Tashmë virusi Zika nuk është më një emergjencë globale. Organizata Botërore e Shëndetësisë ka bërë me dije se virusi, i cili mendohet se kishte lidhje të drejtëpërdrejtë me mikrocefalinë, nuk është më në fazën aktive.
Kjo përfundon një periudhë të gjatë që kur virusi u kthye në një shqetësim ndërkombëtar e aq më tepër kur gjatë kohës së zhvillimit të Lojërave Olipmpike në Rio de Zhaneiro ndihej frika e përhapjes së këtij virusi.
Shumë atletë dhe dashamirës të sportit hoqën dorë nga udhëtimi drejt një prej vendeve që konsiderohej si bërthama e Zikës. Por tani ekspertët, të cilët nuk e nënvlerësojnë rrezikun nga Zika, thonë se tani është zhvendosur në një projekt më afatgjatë.
Tashmë në plan të parë për OBSH është shfarrosja e malarjes apo të tjera sëmundje që lidhen me pickimet e mushkojave në zonat tropikale të Afrikës, që janë burim i këtyre viruseve.
Ndërkohë, e para vaksinë për malarian do të testohet në një projekt pilot në shkretëtirën sub-Sahariane. Fondet janë mbledhur për të mundësuar krijimin e kësaj vaksine, që mendohet se do ta shfarrosë njëherë e mirë parazitin vdekjeprurës të malaries.
/ Top Channel
