Shukri Xhelili nuk arriti dot të fitonte dje lirinë në apel. Gjykata e Apelit për Krime të Rënda refuzoi kërkesën e ishkryebashkiakut të Dibrës për lirim.
Burime pranë Apelit pohuan se ishkryebashkiaku nuk ka bërë asnjë deklarim nga kafazi i sallës së gjyqit. Ai është mjaftuar vetëm me konfirmimin e gjeneraliteteve dhe me faktin se ishte dakord me pretendimet e ngritura nga përfaqësuesi i tij ligjor, avokati Ferdinand Doja.
Në seancë avokati ka kërkuar lirimin e klientit, duke këmbëngulur në dyshimin e manipulimit të videos së realizuar nga kallëzuesja 20 vjeçare, shkruan Panorama.
Kundër këtij qëndrimi ka qenë përfaqësuesi i Prokurorisë, sipas të cilit, organi i hetimit ka prova të mjaftueshme që provojnë për të provuar dyshimin se Shukri Xhelili ka kryer veprën penale për të cilën akuzohet.
Referuar deklarimeve të 20vjeçares A.A. në Prokurori, vetëm filmimi i kryer në zyrën e Shukri Xhelilit në Bashkinë e Dibrës është kryer përmes telefonit të saj personal. Këtë telefon e reja pretendon ta ketë shkatërruar nga nervat, pasi kishte ruajtur videon më parë.
“Telefonin me të cilin filmova Shukri Xhelilin në zyrën e tij, pasi kam nxjerrë me USB materialin filmik, e kam hedhur nga nervat dhe është thyer dhe e kam hedhur. Ndërsa USBnë e kam dërguar tek ‘Oranews’. Pra, videoja e publikuar është realizuar nga ana ime”, ka deklaruar A.A.
