Komisioni Qendror i Zgjedhjeve ka ‘shpallur në kërkim’ një kandidat për Këshillin Bashkiak të Kavajës për ta emëruar në detyrë.
Kjo situatë e pazakontë është pjesë e ‘sfidave’ të mazhorancës në menaxhimin e 100% të pushtetit lokal pas zgjedhjeve të 30 qershorit që u bojkotuan nga opozita.
Dy këshilltarë të Bashkisë së Kavajës dorëzuan mandatet pasi morën pozicione të tjera në administratë. Si pasojë KQZ duhet të plotësojë vakancat me kandidatët e tjerë në listë.
ABC News raporton se lista e socialistëve kishte shteruar kështu që mandati i kalon automatikisht partisë tjetër brenda koalicionit e në rastin konkret, Partisë G-99, e krijuar nga kryebashkiaku i Tiranës Erion Veliaj pasi ai la lëvizjen ‘MJAFT’.
KQZ kontaktoi me shkrim me 4 kandidatët e parë të kësaj partie ku i kërkoi të dorëzojë formularin e dekriminalizimit brenda 10 ditësh e më pas të marrin mandatin në Këshillin Bashkiak. Të katër ftesat e para u refuzuan pasi asnjë prej kandidatëve nuk e dorëzoi formularin.
Kjo e detyroi KQZ të kontaktojë kandidatin e 5-të, Mendel Bykun. Ky i fundit nuk gjendet. KQZ është përpjekur ta kontaktojë përmes postës por në përgjigjen e saj ajo thotë se njoftimi nuk i është dorëzuar për arsye se rezulton të jetë në Itali.
Kështu, duke vepruar sipas ligjit, KQZ ka shpallur në kërkim Mendel Bykun duke bërë afishim publik në bashkinë Kavajë si dhe shpallja është publikuar edhe në faqen zyrtare të internetit të Komisionit Qendror të Zgjedhjeve.
Nëse ai nuk i përgjigjet thirrjes për të dorëzuar formularin brenda afatit ligjor, atëherë KQZ-së do t’i duhet të kontaktojë me kandidatin e 6-të në listën e G-99. /Opinion.al
