Një takim mes kreut të Komisionit të Posaçëm, Fatmir Xhafaj dhe Eduard Halimit sot në orën 14:00 në zyrat e BE-së edhe në praninë e ambasadorëve Lu e Vlahutin i ka hapur rrugën dialogut për Reformën në Drejtësi.
Kreu i PD nga ‘Zeri i Amerikës’ deklaroi sot se mazhoranca u tërhoq dhe pranoi të nisë dialogun politik të mërkurën dhe të enjten. Ndërsa pas dialogut, puna do t’ i kalojë ekspertëve të nivelit të lartë.
” Nën presionin e aleatëve tanë, Shteteve të Bashkuara të Amerikës, sot duket se mazhoranca ka reflektuar dhe, të paktën në letër, sot ka rënë dakord për të nisur dialogun politik pa kushte, por bazuar mbi rekomandimet e Komisionit të Venecias për reformën në drejtësi.
Në qoftë se marrëveshja e sotme respektohet, dhe për fat të keq nuk do të ishte çudi që do të shkelej njësoj si marrëveshja e 8 janarit, po ashtu e negociuar nga ambasadori Lu – por shpresoj që jo, – atëherë kjo do t’i hapë rrugë kompromisit, konsensusit politik për një hap shumë të rëndësishëm si Reforma në Drejtësi.
Ky është një hap i rëndësishëm jo për politikën, jo për PD-në apo për PS-në, por për qytetarët shqiptarë. Ajo për çfarë ne këmbëngulim, konsensusi politik nuk ka të bëjë me faktin që PD të ketë më shumë kontroll, apo PS të ketë më pak kontroll te drejtësia.
Ka të bëjë me faktin që një drejtësi e kontrolluar politikisht nuk do t’u shërbejë qytetarëve shqiptarë, nuk do të japë drejtësi, do të vazhdojë të mbetet e korruptuar.
Prandaj lufta jonë nuk është për interesa politike, për interesat e PD-së apo të Lulzim Bashës, por për t’u dhënë shqiptarëve një drejtësi të pakorruptuar, të pakapur politikisht, e cila iu shërben qytetarëve dhe jo politikës” tha Basha.
Palët kanë rënë dakord që çështjet e mbetura pezull të marrin zgjidhje nga propozimet e ekspertëve europianë dhe amerikanë, përkatesisht nga zyrat e drejtësisë të misioneve EURALIUS dhe OPDAT.
[fbvideo link=”https://www.facebook.com/zeriamerikes/videos/10153923655694536/” width=”500″ height=”400″ onlyvideo=”1″]
