Zv.kryeministrja dhe njëherazi ministrja për Infrastrukturën dhe Energjinë, Belinda Balluku është shprehur në një konferencë për mediat këtë të hënë se autostrada Tiranë-Durrës do të zgjerohet me nga një korsi, si edhe do të shtohet korsia e emergjencës.
Ajo u shpreh se nuk do të preken rrugët dytësore dhe bizneset, duke nënvizuar se për këtë projekt infrastrukturor nuk do të ketë shpronësime masive.
“Zgjerimi i Tiranë-Durrësit do të marrë një korsi nga secila anë, pra do ketë një korsi të plotë secila anë plus korsinë e emergjencës. Sqarojmë që nga gjithë studimi që kemi bërë nuk prekim rrugët dytësore dhe bizneset, pra nuk do ketë shpronësime masive, mund të ketë disa zona ku afrohen më shumë me shtratin e rrugës që do të jenë të nevojshme, por është parashikuar që do të ketë një zgjerim, pra do të ketë 3 korsi të plota, plus korsinë e emergjencës. Sigurisht Tiranë-Durrësi është një nga akset më të rëndësishme, por në të ardhmen përdorimi i tij do të jetë më i pakët nga ç’është sot. Nga ana tjetër që në 5-vjeçarin e ardhshëm i gjithë ky rrjet do të jetë i integruar me njëri tjetrin dhe fluks e trafikut do jenë të mirë rregulluara pasi këtë vit duhet të nisë edhe ndërtimi i Kashar-Lekaj. Pra është komplet një aks i ri i cili kalon përmes zonës së Arbanës, Ndroqit dhe akseson Rrogozhinën duke i dhënë mundësi kështu të gjithë atyre drejtuesve të automjeteve që kërkojnë të shkojnë në pjesën jugore dhe janë duke ardhur nga veriu mos t’i afrohen fare Durrësit, mos futen në Tiranë, por të vazhdojnë drejtë. Pra do të ketë disa zgjedhje dhe zgjidhje në të ardhmen në këtë proces të rregullimit të trafikut kombëtar”-tha Balluku.
