Pas përfundimit të mbledhjes së Këshillit Politik, kryeministri Edi Rama u është përgjigjur akuzave të PD në lidhje me marrëveshjen e reformës zgjedhore të arritur më 5 qershor.
Rama është shprehur pasditen e sotme se ditën e nesërme reforma zgjedhore do të miratohet në Kuvend dhe më pas do të hyjë në fuqi.
Po ashtu, kryeministri siguroi se marrëveshja e 5 qershorit nuk do të preket as nga ndryshimet kushtetuese.
“Ajo që kemi diskutuar me ekspertët në atë pjesë të shkurtër në mbledhje ka qenë adresimi i çështjeve, që u ngritën dje. Në një prej tyre ishte dhe kjo çështje. Këtu ekspertët kanë dhënë një përgjigje shteruese. Që asgjë nuk preket në përmbajtjen e marrëveshjes së 5 qershorit, asgjë. Reflektimi në ligjin zgjedhor i risive kushtetuese është diçka tjetër. Dhe nëse reflektimi do të kërkojë që të plotësohet një nen kur ndërkohë ka një nen të marrëveshjes, kjo s’ka të bëjë fare, është absurditet. Marrëeshja e 5 qershorit votohet nesër. Në 30 qershor do të votohen ndryshimet kushtetuese. PD s’ka çfarë pret nga Këshilli lidhur me çështjet që ka ngritur.”- tha Rama./ Opinion.al
