TIRANE- Arben Gjata fitoi zgjedhjet në Universitetin e Mjekësisë, duke u shpallur Rektori i ri. Por ky rezultat është kundërshtuar nga kandidati tjetër Petrit Bara.
Gjatë numërimit të tyre, kandidatët kanë qenë vetë prezentë apo kanë pasur delegatë në sallën e numërimit, duke përllogaritur kështu votat që ka marrë secili. Pikërisht këtu ndodh përplasja. Ndërsa rezultati që dhanë të gjitha mediat tregonte për një fitore të Arben Gjatës me gjashtë vota më shumë se kolegu i tij, Petrit Bara, hedh poshtë këtë kalkulim.
Kjo ka qenë arsyeja që e ka çuar atë ditën e djeshme të bëjë një kërkesë për rinumërim të votave pranë Komisionit Institucional të Zgjedhjeve, bazuar në votat e pavlefshme dhe mundësinë e një gabimi njerëzor në përllogaritjen e votave të studentëve. “Unë, kandidati për rektor, Petrit Bara kërkoj rinumërimin e të gjitha votave në rang universiteti për titullin rektor dhe rivlerësimin e 8 votave të pavlefshme që ndikojnë në ndryshimin e rezultatit. Këtë e kërkoj për të shmangur gabimet njerëzore që mund të jenë bërë ose edhe në Prof. Dr. Petrit Bara
Për gazetën “Panorama”, mjeku kardiolog shpalos edhe një tjetër pretendim. Sipas tij, janë gjashtë pedagogë të brendshëm të filialeve të Infermierisë në Kukës e Sarandë e më shumë se 300 studentë, të cilët nuk janë përfshirë në procesin e votimit. Rinumërimi kërkohet të bëhet në prezencën e tre kandidatëve për rektor dhe vëzhguesve e numëruesve të tyre. Brenda ditës së nesërme, KIZ duhet të dalë me një përgjigje mbi kërkesën e zotit Bara, ndërsa pritet zyrtarizmi e certifikimi i rezultatit final të zgjedhjeve, çka hedh poshtë të gjitha dyshimet e pretendimet. Ndërkohë rezultati jozyrtar nxjerr fitues Arben Gjatën me 38.3% të votave, duke lënë pas Petrit Barën me 36.3% dhe Mira Rakacollin 25.4%.
