Deputeti demokrat, Ervin Salianji, në një dalje për mediat, në ambientet e jashtme të Kuvendit, foli për një moment reflektimi te thëllë teksa opozita shënoi një disfatë të thellë në zgjedhjet e 14 majit.
Ndërsa tha se Shqipëria nuk realizon dot zgjedhje të lira dhe të ndërshme, Salianji theksoi se çdokush nga PD duhet të mbajë përgjegjësi në zona konkrete. Ai foli gjithashtu edhe për deputetë demokratë që nuk kanë bërë fushatë si dhe për persona që kanë punuar kundër.
“Për opozitën, për PD-në edhe për shoqërinë shqiptare nuk është një moment skemash apo një moment për të përfituar personalisht askush. Është një moment ku përtej një reflektimi të thellë ne duhet ta lexojmë drejt rezultatin. U bënë disa zgjedhje që Edi Rama nuk ndryshon. Padiskutim që vërtetohet ajo që ne themi prej kohësh që është një regjim. Padiskutim që vërtetohet që Shqipëria nuk garanton dot zgjedhje të lira, të ndershme dhe të barabarta siç e kërkon kushtetuta. Duke qenë se herë pas here ne po i kthehemi të njëjtës situatë mendoj që është momenti që të kemi ndryshime reale dhe përgjegjësinë gjithsecili në këto zgjedhje ta mbajë dhe ta shohë personalisht në zonat që mbulonte, në zonat ku ka bërë fushatë dhe akoma më keq ka akoma njerëz që nuk kanë bërë fushatë dhe e kanë dëmtuar opozitën dhe PD”-tha Salianji.
I pyetur se kush e ka dëmtuar PD, Salianji u përgjigj: “Deputetë të PD-së që nuk bëjnë asnjë ditë fushatë. Deputetë që dihen publikisht kush kanë qenë. Ka njerëz që kanë punuar edhe kundër. Në këtë sens duhet që së pari të mbajmë përgjegjësinë dhe të shohim se çfarë kanë bërë vetë. Së dyti ata që kanë pasur përgjegjësi konkrete në zona konkrete të mbajnë po ashtu përgjegjësitë e veta në raport me rezultatin sepse në çdo moment që themi dhe kemi diskutuar dhe e kemi të rikonfirmuar tani që qeveria e Ramës përdor bandat, paratë, institucionet shtetërore, që grupet kriminale u involvuan dhe u përfshinë në mënyrë masive në këto zgjedhje. Përtej të gjitha këtyre elementeve PD duhet të gjejë mekanizmat e duhur për të tejkaluar edhe vetveten dhe për të imponuar në shoqëri një parti që i përket gjithë shoqërisë dhe jo vetëm atyre që militojnë në PD”.
