Ditën e djeshme u zhvilluan në Shqipëri zgjedhjet e 9 të Parlamentit Shqiptar. Ky proces ka ngjallur edhe interesin e disa prej mediave të huaja, të cilat kanë raportuar disa prej detajeve të deritanishme.
AL Jazeera, raporton se Partia Socialiste e Shqipërisë fiton zgjedhjet sipas sondazheve, duke iu referuar kështu Exit Poll-eve. Në të njejtën mënyrë shprehet edhe Reuters, e cila flet për një fitore të madhe të Partisë Socialiste. Në artikull pasqyrohet edhe përqindja e votuesve të cilët morën pjesë në këto zgjedhje.
Mediat e huaja i referohen sondazhit italian, IPR Marketing ku PS del fituese me 45-49 përqind të votave. Al Jazeera thekson se në vitin 2013 asnjë prej partive të mëdha nuk mori një shumicë të drejtëpërdrejtë parlamentare.
“Asnjëra parti nuk fitoi një shumicë të drejtpërdrejtë në parlamentin me 140 vende në zgjedhjet e vitit 2013 ose 2009.” – shkruan Al Jazeera.
“Euronews” nga ana tjetër, shkruan se kryeministri Edi Rama do të rikthehet në pushtet dhe do të sigurojë më shumë se 71 mandate në parlament.
