Edhe pse ende ka mbetur një përqindje e vogël votash pa numëruar, LSDM e drejtuar nga ish-kryeministri Zoran Zaev shpalli fitoren në zgjedhjet e të mërkurës.
Vetë Zaev i quajti rezultatet një avantazh bindës dhe të qëndrueshëm me mbi 3 mandate më shumë se VMRO-DPMNE-së.
Në daljen e parë para mediave, ish-kryeministri i vlerësoi zgjedhjet si europiane, të sigurta dhe bashkëkohore si dhe falënderoi të gjithë ata që dolën për të votuar. Sipas të dhënave ende jo përfundimtare të Komisionit Shtetëror të Zgjedhjeve, LSDM është forcë e parë politike me 36.13% të votave, ndjekur më pas nga rivalja VMRO-DPMNE me 34.65%, ndërsa BDI e Ali Ahmetit renditet në vend të tretë me 11.57% të votave.
Disa prej qendrave të votimit qëndruan të hapura përtej orarit zyrtar, që ishte ora 21:00 e mbrëmjes ndërsa 1,8 milionë qytetarë me të drejtë vote iu drejtuan kutive të votimit në një situatë të pazakontë, për shkak të pandemisë.
