“Beteja ime është kundër vjedhjeve që i bëhen popullit më të varfër në Europë”.
Kështu u shpreh këtë të martë Agron Shehaj, kreu i Partisë Mundësia në një intervistë në Klan News. Përballë gazetarit Drini Zeqo, ai u shpreh se projekti i partisë së tij është afatgjatë dhe zgjedhjet e ardhshme janë vetëm fillimi.
“Nuk është ky projekti ynë politik. Nuk kemi krijuar një parti politike thjesht për të qenë në parlamentin e ardhshëm, për të maksimizuar numrin e deputetëve. Ky është projekt politik afatgjatë për t’i dhënë sot Shqipërisë një opozitë si asnjëherë më përpara dhe me kohë, sigurisht zgjedhjet e ardhshme janë vetëm fillimi. Kjo është arsyeja pse jam në politikë”, tha Shehaj.
Ai komentoi edhe përplasjen me deputetin e Partisë Demokratike, Flamur Noka, e cila u përkthye edhe fizike në një nga seancat e parlamentit. Shehaj tha se nuk ka betejë me PD-në, por theksoi se Noka shpif ndaj tij.
“Unë s’kam betejë me Partinë Demokratike. Ndërkohë që merrem me vjedhjen e shekullit 1.3 miliardë Euro, ndërkohë pas shpine vijnë Flamur Noka dhe fillimisht me dhunë me del kundër ndërkohë që i kërkoj llogari qeverisë për këtë vjedhje, tani del me shpifje, del Flamur Noka dhe shpif, ekran më ekran. Shpifja është kjo. Çfarë do lloj gjëje nxjerr Flamur Noka nga goja është shpifje. Është shpifje që unë kam fituar tendera, është shpifje që familjarët e mi kanë fituar tendera, është shpifje që familjarët e mi apo unë kemi fituar leje ndërtimi, është shpifje që unë kam ndërtuar apo kam shitur Ajola Xoxës shtëpi. Janë shpifje”, tha Shehaj.
Shehaj tha ndër të tjera se partia e tij “nuk po merret me procesin, por me diasporën”. Ai njoftoi se Partia Mundësia do të zhvillojë më 2 shkurt konventën e parë në Itali ndërsa theksoi se partitë e vogla nuk pyeten se si do të realizohet procesi i votës së diasporës duke hedhur akuza ndaj mazhorancës.
