TIRANE- Deputeti Ben Blushi ka komentuar deklaratën e Pandeli Majkos se nëse nuk miratohet reforma në drejtësi do të shkohet në zgjedhje të parakohshme. Blushi tha se ky është një kërcënim për Metën nga ana e PS-së.
“Unë besoj se kushdo që do ta çojë PS-në në opozitë propozon zgjedhje të parakohshme. Nëse shkohet në zgjedhje pa koalicionin që kemi është kërcënim për partinë tjetër të koalicionit”, tha Blushi.
Më tej ai shpjegoi qendrimin e tij, duke thënse se “nëse shkohet në zgjedhje për reformën në drejtësi kush garanton se parlamenti i ri do ti ketë votat e mjaftueshme për ta kaluar këtë reformë?”
Sipas Blushit, zgjedhjet e parakohshme nuk i shërbejnë askujt. “Zgjedhjet trembin tregjet, kjo nuk është më mënyra e duhur. Është lojë me peta brenda koalicionit”, tha ai.
Deklarata u bë në përfundim të mbledhjes së grupit parlamentar socialist. Ndryshe nga herët e tjera, Blushi nuk foli për atë ç’ka ndodhi sot në mbledhje.
