Sipas Komisionit të Qendror të Zgjedhjeve në Indonezi, 272 persona kanë humbur jetën për shkak të lodhjes nga numërimi i votave. Zëdhënësi i këtij institucioni, Arief Priyo Susanto, tha gjithashtu se të paktën 1,878 persona të tjerë janë sëmurur nëpër qendrat e numërimit të votave. Përllogaritet që për administrimin e procesit paszgjedhor janë angazhuar më shumë se 7 milionë njerëz, që prej ditës së votimeve më 17 prill. Ata kanë punuar me turne të zgjatura, në ambiente të vogla dhe me pak ajër.
Këto zgjedhje në Indonezi janë konsideruar si më të ndërlikuarat në histori, pasi u mbajtën në të njëjtën ditë zgjedhjet presidenciale dhe ato parlamentare, me qëllim për të kursyer. Kanë votuar rreth 80% e 193 milionë njerëzve që kishin të drejtën e votës. Kanë qenë rreth 800 mijë qendra votimi në 18 mijë ishuj të vendit, ku njerëzit kanë zgjedhur mes 245 mijë kandidatëve.
Qeveria e Indonezisë ka thënë se do të dëmshpërblejë familjet e të vdekurve me 36 milionë rupie (rreth 2,200 euro), shumë e barabartë me një pagë vjetore./Opinion.al
