Kreu i opozitës Lulzim Basha ka deklaruar sot nga çadra e protestës se, më 7 maj, pikërisht ditën e mbajtjes së zgjedhjeve lokale në Kavajë, opozita do të organizojë një protestë të madhe kombëtare. “Vendimi i dytë i opozitës së bashkuar rreth kësaj agjende është mbajtja më datën 7 maj e një proteste të madhe kombëtare në Kavajë, për të pamundësuar me forcën e bashkimit përmes një lëvizje popullore, paqësore, demokratike, zgjedhjet fasadë të diktuara nga krimi,” është shprehur Basha.
Kjo deklaratë erdhi pas një takimi të partive të opozitës në selinë e Partisë Demokratike, ku u tha se në Kavajë do të mbahet protesta e madhe kombëtare. Opozita nuk do të marrë pjesë me kandidatë në këto zgjedhje dhe është kundër.
Më herët, drejtues të Partisë Demokratike kishin njoftuar se në Kavajë nuk do të ketë zgjedhje. Ndërsa Kavaja pritet të jetë prova gjenerale për çka mund të ndodhë më 18 qershor në zgjedhjet e përgjithshme.
Kujtojmë që po sot përfundon edhe afati për regjistrimin e partive për zgjedhjet e qershorit. Partitë opozitare konfirmuan se nuk do të regjistrohen. /opinion.al
