Ambasada e Shteteve të Bashkuara në Tiranë ka bërë thirrje përmes një deklarate se ata presin që zgjedhjet vendore të 30 qershorit të kryhen në mënyrë të qetë dhe transparente.
Në deklaratën e saj ambasada dënon çdo formë dhune dhe thotë se ata që e shkaktojnë atë duhen hetuar.
Më tej në deklaratë shtohet se vëzhguesit e SHBA do të jenë të pranishëm në qendrat e votimit dhe se vlerësimi i tyre do të mbështetet në raportin e OSBE/ODIHR-it.
Deklarata e plotë e Ambasadës së Shteteve të Bashkuara në Tiranë
“Shtetet e Bashkuara të Amerikës i bëjnë thirrje të gjithë udhëheqësve politikë, zyrtarëve të qeverisë, agjencive të sigurisë dhe qytetarëve shqiptarë që të sigurohen që zgjedhjet e 30 qershorit të zhvillohen në mënyrë të qetë dhe transparente. Ne nxisim udhëheqësit politikë të refuzojnë çdo dhe të gjitha llojet e dhunës, apo çdo përpjekje për të penguar procesin zgjedhor apo edhe të drejtën e çdo qytetari për të votuar. Dhuna nuk është një mënyrë legjitime e të shprehurit politik. Ata që përfshihen në akte dhune duhen hetuar me të gjithë fuqinë e ligjit.
Shtetet e Bashkuara do të kenë ekipe vëzhguesish në qendrat e votimit dhe qendrat e numërimit në mbarë Shqipërinë. Ne do të mbështetemi në raportin e OSBE/ODIHR-it për të vlerësuar rregullsinë e votimit.
Ne nxisim udhëheqësit politikë që, pas zgjedhjeve të së dielës, të rikthejnë vëmendjen e tyre në forcimin e institucioneve demokratike shqiptare dhe zbatimin e ligjit, përfshirë edhe ecjen përpara me ngritjen e një Gjykate Kushtetuese të drejtuar nga gjykatës të cilët e kanë kaluar vetingun. Miratimi i reformave zgjedhore dhe zbatimi i reformës në drejtësi janë thelbësore për aspiratat europiane të Shqipërisë dhe për ngritjen e demokracisë së fortë që i shërben të gjithë shqiptarëve.” /Opinion.al
