Kryekomisioneri shtetëror Ilirjan Clibashi, ka qenë paraditen e sotme pjesë e nje tryeze me temë “Mbrojtja e integritetit zgjedhor në Shqipëri”, ku nënvizoi disa probleme që shoqërojnë procesin zgjedhor në vendin tonë.
Gjatë fjalës së tij, Celibashi u shpreh se është e rëndësishme që kandidatët që do u ofrohen qytetarëve në zgjedhjet vendore të 14 Majit duhet të jenë individë me integritet dhe pa rekorde kriminale.
“Thelbësore është që kandidatët që do t’u paraqiten qytetarëve të jenë individë të përshtatshëm e me integritet që t’u shërbejnë interesave të zgjedhësve. Një kandidat i përshtatshëm zotëron kualifikimet, zotësitë dhe atributet e nevojshme për të mbajtur poste publike, janë individë që kanë një histori të dëshmuar të sjelljes së tyre etike, integritetit dhe respektit për shtetin e së drejtës. Dikush që është i aftë të marrë vendime që të ndihmojë e bashkëpunojë me zgjedhësit. Zgjedhja e kandidatëve të pastër ligjërisht është thelbësore për funksionimin e duhur të një shoqërie demokratike. Këta individë kanë më shumë gjasa të mbështesin parimet e demokracisë dhe të veprojnë në interesin më të mirë të zgjedhësve të tyre e të punojnë me zyrtare të tjerë në interes të qytetarëve. Zgjedhja e kandidatëve të papërshtatshëm me rekorde të shkeljes së ligjit, veçanërisht në atë penal mund të ketë pasoja të rënda për procesin demokratik. Zgjedhja e kandidatëve të papërshtatshëm mund të çojë në një sërë pasojash të rënda përfshirë korrupsionin dhe nepotizmin më së pari”, theksoi ai.
Më tej Celibashit pohoi se individë të tillë mund të përdorin pozitat e tyre shtetërore për përfitime personale, si dhe të përfshihen në praktika jo etike e t’u japin përparësi interesave të tyre.
“Kjo gërryen besimin e publikut në procesin zgjedhor e minon legjitimitetin e qeverisë së zgjedhur qoftë qendrore dhe ajo lokale. Shkeljet ose keqpërdorimi i të dhënave mund të dëmtojë qytetarët dhe të rrezikojë integritetin e procesit zgjedhor. Përdorimi i të dhënave mund të çojë në krijimin e profileve digjitale të votuesve që mund të përdoret për t’i targetuar ata me mesazhe të personalizuara politike dhe elektorale. Ky lloj shenjestrimi mund të jetë ndërhyrës dhe manipulues”, u shpreh kryekomisioneri.
