Ambasada e Shteteve të Bashkuara të Amerikës në Tiranë ka dalë sot me një deklaratë ku u ka bërë thirrje të gjitha partive politike të zhvillojnë aktivitetet e tyre zgjedhore ne përputhje me ligjin dhe standardet ndërkombëtare.
Ndër të tjera Ambasada ka kujtuar drejtuesit politikë që të sigurojnë që listat e tyre të kandidatëve të përmbushin kërkesat e ligjit, si dhe pritshmëritë e qytetarëve shqiptarë për kandidatë të pastër dhe me integritet të lartë.
Në 50 ditë, më 14 maj, Shqipëria do të zhvillojë zgjedhjet bashkiake mbarëkombëtare. U bëjmë thirrje të gjitha partive dhe institucioneve politike që të sigurojnë që aktivitetet zgjedhore të zhvillohen në përputhje me ligjin shqiptar dhe standardet ndërkombëtare.
Pas zgjedhjeve parlamentare të prillit 2021, raporti i ODIHR përshkruan fushat e progresit të vazhdueshëm si dhe mangësitë. Në veçanti, kishte raporte të besueshme për blerje votash, presion mbi votuesit dhe keqpërdorim të burimeve shtetërore dhe të dhënave personale. Shtetet e Bashkuara i bëjnë thirrje qeverisë, partive dhe institucioneve shtetërore të zbatojnë rekomandimet e ODIHR-it.
Siç diskutoi kohët e fundit ambasadorja Kim me liderët e partive, partitë politike duhet të sigurojnë që fushatat dhe aktivitetet zgjedhore të zhvillohen në mënyrë të drejtë, të rregullt dhe transparente. Drejtuesit duhet të sigurojnë që listat e tyre të kandidatëve të përmbushin kërkesat e ligjit, si dhe pritshmëritë e qytetarëve shqiptarë për kandidatë të pastër dhe me integritet të lartë. Strategjia e Presidentit Biden për Kundër Korrupsionit identifikon kërcënimin unik që paraqet korrupsioni për demokracinë dhe sigurinë tonë kombëtare.
Shtetet e Bashkuara mbështesin fuqimisht kërkesën e popullit shqiptar për një demokraci të fortë. Ne u bëjmë thirrje të gjithë liderëve dhe institucioneve që të vazhdojnë të përmirësojnë proceset zgjedhore të Shqipërisë dhe ta bejnë Shqipërinë të ecë përpara në rrugën e saj demokratike.
