Teksa numërimit të votave në vend po i vjen fundi dhe harta e Shqipërisë është ngjyrosur ‘rozë’, kanë filluar urimet e para në drejtim të kryeministrit Rama për fitoren e mandatit të katërt qeverisës.
Ka qenë kryeministrja e Italisë, Giorgia Meloni, e cila ka uruar pasditen e sotme Edi Ramën për fitoren në zgjedhjet e 11 majit.
Përmes një postimi në platformën ‘X’, Meloni shkruan se do vazhdojnë të punojnë për të forcuar edhe më tej lidhjet mes dy vendeve.
Më tej, ajo thekson se miqësia mes dy kombeve është forcuar falë nismave të përbashkëta dhe rezultat i një dialogu konstruktiv.
Postimi i plotë i Melonit:
“Do të doja t’i shprehja urimet e mia të përzemërta Kryeministrit Edi Rama për rikonfirmimin e tij si kreu i qeverisë shqiptare.
Miqësia e thellë dhe bashkëpunimi strategjik që lidh dy kombet tona është forcuar më tej falë nismave të përbashkëta, rezultat i dialogut konstruktiv dhe një dëshire të përbashkët për t’iu përgjigjur sfidave globale me zgjidhje inovative.
Ne do të vazhdojmë të punojmë për të forcuar më tej lidhjen midis dy qeverive tona dhe për të arritur objektiva të përbashkëta, duke përfshirë forcimin e stabilitetit në Ballkan dhe avancimin e rrugës evropiane të Shqipërisë.”
