Enkelejd Alibeaj ka prezantuar kandidatin e PD për bashkinë e Dimalit që do të garojë në zgjedhjet lokale të 14 majit. Bëhet e ditur se ai është biznesmeni Dritan Sula.
“Ai është diplomuar në Universitetin Bujqësor të Tiranës, është një njeri aktiv në politikë dhe jetën e tij profesionale dhe shoqërore e ka të lidhur me vendlindjen e tij. Sula është aktiv në Partinë Demokratike që në vitin 1991 kur iu bashkua lëvizjes antikomuniste për rrëzimin e diktaturës, për të vijuar më pas me themelimin e PD në vendlindjen e tij, deri në drejtimin e degës së saj, funksion të cilin e mban dhe sot. Dritan Sula me kandidimin e tij për bashkinë Dimal, synon që të jetë në shërbim të bashkëqytetarëve të vet duke ofruar një projekt konkret për të rikthyer bashkinë tek qytetarët, të cilët gjatë qeverisjes së Rilindjes janë nëpërkëmbur e lënë në harresë nga bashkia”, thuhet në njoftim.
Alibeaj nuk arriti një marrëveshje me Berishën për të dalë me kandidatë të përbashkët në zgjedhjet lokale dhe tashmë ka njoftuar se do të garojë në zgjedhjet e 14 majit me kandidatët e tij.
Ndërkohë, Gentjan Meçe është kandidati i dalë nga primaret e PD të Berishës në garë për këtë bashki.
