Kandidati për kryetar të Partisë Demokratike, Lulzim Basha ka votuar rreth orës 11:00 në Njësinë e Degës 8 të PD-së.
Pas votimit Basha ka dhënë një prononcim për mediat, ku ka shprehur mirënjohjen për demokratët që i janë drejtuar kutive të votimit në këtë ditë që ai e cilëson “unike” për PD-në.
Gjatë fjalës së tij, Basha tha se kjo ditë është e veçante për nga rrethanat, ndërsa iu bëri thirrje demokratëve që të votojnë.
“Dua të shpreh mirënjohjen ndaj mijëra demokratëve që i janë drejtuar kutive të votimit në këtë ditë unike për PD-në. Unike sepse jemi përballur me sfida si askush, sepse ata mijëra demokratë kanë përjetuar padrejtësi të mëdha dhe vazhdojnë të qëndrojnë për kauzat dhe vlerat që e bashkojnë këtë parti politike. Kjo dalje masive që ka marrë me qindra mesazhe dhe foto të demokratëve në këtë proces, të vendosur që përmes votës së tyre të rinisin një ringritje të PD, me dhembshuri për çdo shqiptar me shpresë tek Shqipëria dhe besim tek Zoti”, tha Basha.
