Pas ngjarjes së rëndë të grabitjes së rreth 1 milionë eurove në pistën e avionëve në Rinas, policia dhe privati që menaxhon Rinasin (TIA) janë përfshirë në debate lidhur me përgjegjësinë për sigurinë.
Policia ka theksuar disa herë se sigurinë e Cargos në Rinas, TIA ia ka thënë një kompania tjetër private të quajtur ICTS. Pra, policia nuk ka patur të drejtë të hyjë në këtë pjesë të aeroportit. Sakaq, TIA, përmes drejtores të komunikimit, ka thënë se policia duhet të presë hetimet, pasi përgjegjësia është e përbashkët, duke përmendur edhe argumentet.
Ndërkohë, sot në një status në facebook-un personal, drejtoresha për mediat në TIA, Arlinda Çausholli flet ashpër ndaj gazetarëve. Sipas saj, ata janë duke manipuluar, dhe duke iu referuar vetëm të dhënave të policisë për ngjarjen. “A jemi shqiptarë? Apo jemi armiq?”, shkruan ndër të tjera ajo.
Statusi i plotë i Çaushollit
Unë nuk e di çfarë ka prapa këtij sulmi absurd ndaj Aeroportit Ndërkombëtar të Tiranës.
As nuk e di nga buron histeria mediatike që kompromenton sigurinë reale të Aeroportit. Nuk e di pse mungon filtri etik i integritetit i gazetarëve me pretendimin se e tillë është media në Shqipëri dhe e tillë është linja editoriale.
Ku ka editor më të mirë se të qenit zot i vetes dhe jo shërbëtor? Ku ka editor më të mirë se integriteti dhe shansi që i jepet të drejtës për të dalë në pah, koha që respektohet për hetimet dhe për çdo njeri të përfolur.
A jemi shqiptarë? Apo jemi armiq?
Në cilin vend të botës është parë të sulmohet një koncension i mbështetur me ligj – i mirë apo i keq – që rregulloi imazhin e Shqipërisë, i dha zemër një zone që ishte në pikë të hallit, punësoi 1 000 veta, ndërsa tani familjet e tyre nuk arrijnë të mbyllin sy për shqetësimin që shqiptari i bën shqiptarit me kryqëzatë pa vendim.
40 persona humbën jetën në aeroportin e Stambollit, dhe asnjë turravrap fajësimi për mungesë sensorësh apo masash në hyrje të tij pas gjëmës së Brukselit.
U bënë bashkë të gjitha palët, dhe diskutimet e sigurisë – që duhet të jenë dhe të mbeten konfidenciale – u mbyllën e u vulosën në respekt të dinjitetit të një kombi.
Kush nuk do vendin e vet, nuk do veten e vet.
Bëni durim. Ose kolegët që marrin përsipër të flasin për aeroportin, të paktën të kenë hyrë një herë brenda me fletëkalimet e firmosura nga unë…..Apo keni hyrë me lejen e policisë. Mbase kjo mund të qëndrojë.
Për shumë vjet Bajramin.
