Një shtëpi bari është zbuluar nga policia në Fier. Në një njoftim për mediat uniformat blu bëjnë me dije se si rezultat i kontrolleve, bazuar dhe në inteligjencën policore, në kuadër të operacionit policor të koduar “Vila”, u zbulua një vilë e përshtatur për kultivim të bimëve narkotike, me anë të llambave.
Në kuadër të operacionit, në përfundim të veprimeve të para hetimore u bë arrestimi në flagrancë i shtetasit: E. M. alias Xh. G., 44 vjeç, pronar i vilës tre katëshe, i cili kishte përshtatur 5 dhomat e njërit kat, për kultivimin e bimëve narkotike, me anë të llambave që furnizoheshin me lidhje të paligjshme të energjisë elektrike. Ai akuzohet për veprat penale “Prodhimi dhe shitja e narkotikëve” dhe “Vjedhja e energjisë elektrike.
Gjithjashtu është arrestuar edhe K. G., 40 vjeç, me detyrë faturist i OSHEE-së, për veprën penale “Shpërdorimi i detyrës”dhe B. F., 47 vjeç, me detyrë elektricist i OSHEE-së, për veprën penale “Shpërdorimi i detyrës”.
Gjatë operacionit u sekuestruan 181 bimë narkotike të cilat ishin kultivuar në vazo që u gjetën brenda ambienteve të përshtatura me llamba, dhjetëra llamba dhe pajisje të tjera elektrike që ishin instaluar në 5 ambientet e banesës. Gjithashtu, u bë bllokimi i vilës 3-katëshe.
Vijon puna për identifikimin dhe kapjen e personave të tjerë të dyshuar të përfshirë në këtë veprimtari kriminale. Në bashkëpunim me Prokurorinë, vijon dhe hetimi pasuror ndaj pronarit të vilës, shtetasit E. M.
Materialet procedurale i kaluan Prokurorisë pranë Gjykatës së Rrethit Gjyqësor Fier, për veprime të mëtejshme.
