Një rrjet i gjerë trafikantësh droge, të cilët shpërndanin veçanërisht kokainë në zonën e Artës, Athinë, Lefkas dhe Karditsa, është shpërbërë nga policia greke. Sipas mediave greke, që kanë publikuar detajet duke cituar burimet e policisë, krerë të kësaj organizate ishin dy shtetas shqiptarë, njeri 38 dhe tjetri 43 vjeç.
Pjesë e grupit ishin 11 shtetas grekë, që janë arrestuar pas operacioneve në Arta dhe në Karditsa. 9 persona të tjerë janë identifikuar e shpallur në kërkim.
Mes tyre kishte biznesmenë të njohur dhe një grua që kishte profesion mësuesinë. Dy shqiptarët kishin në kontroll furnizimin me drogë dhe transportin e saj në hapësirat e tyre të magazinimit. Organizata kriminale, të paktën tre muajt e fundit, kishte nxjerrë fitime të shumta. Policia gjatë kontrollit në banesa dhe mjediset ku mbahej droga gjetën dhe sekuestruan kokainë, kanabis “çokollatë”, kanabis i papërpunuar, 2.458 euro, 176 fishekë të kalibrave të ndryshëm, katër peshore precizioni, dy autovetura dhe dy motoçikleta, si dhe 18 aparate telefonash celularë. Policia tashmë ka përpiluar dosjen penale kundër të arrestuarve, ndërkohë që po vazhdojnë hetimet dhe kërkimi i 9 personave të tjerë që implikohen në këtë çështje.
