Policia ka arrestuar 4 persona në Korçë ditën e enjte.
Policia thotë se ka sekuestruar 195 kilogramë kanabis që ishte në proces tharje.
Lënda narkotike u gjet në një magazinë ku edhe energjia elektrike ishte lidhur në mënyrë të paligjshme për të tharë bimët narkotike.
Brenda magazinës policia thotë se arrestoi 4 persona. Një tjetër ndërkohë u shpall në kërkim. Këtij të fundit, një 38-vjeçar, iu gjetën në banesë edhe 2 bimë narkotike si dhe sasi të vogla kanabisi dhe kanabisi.
Ndërkohë nga tvklan mësohet se të arrestuarit janë Gentian Guri, Andon Demirshah, Anesti Burda dhe Redion Hamitaj.
Demirshahu akuzohet për prodhim e shitje lëndësh narkotike e vjedhje të energjisë elektrike, ndërsa Burda e Hamitaj vetëm për moskallëzim krimesh. Guri nga ana tjetër për prodhim e shitje lëndësh narkotike, falsifikim dokumentesh dhe armëmbajtje pa leje.
Në ambientet e magazinës janë kapur në flagrancë edhe 3 gra, të gjitha nga Cërriku, për të cilat ka nisur hetimi në gjendje të lirë. Mësohet se ato ishin punëtore në magazinën e drogës.
Autoritetet thonë se sekuestruan në total 1 pistoletë, sasi kokaine, 1 patentë false, 7 celularë, 1 makinë, 1 pasaportë, 3 karta SIM dhe një shumë eurosh.
Të arrestuarit kishin si synim shitjen e drogës në Korçë dhe në qytetet e tjera të juglindjes.
“Seksioni për Hetimin e Narkotikëve i DVP Korçë, gjatë kontrolleve intensive në territor dhe në ambiente të mbylluara, për goditjen e veprimtarive kriminale në fushën e narkotikëve, kanë siguruar informacion për përshtatjen e një ambienti për tharjen e bimëve narkotike dhe përgatitjen e lëndës narkotike për shitje. Shërbimet e Policisë, në kuadër të operacionit policor të koduar “Voskopi”, kanë ndërhyrë menjëherë në ambientet e magazinës në pronësi të shtetasit A. D., në fshatin Voskop, ku kapën në flagrancë dhe arrestuan shtetasit:
A. D., 43 vjeç, banues në fshatin Voskop, për veprat penale “Prodhimi dhe shitja e narkotikëve”, kryer në bashkëpunim dhe “Vjedhja e energjisë elektrike dhe impulseve telefonike”;
G. G., 43 vjeç, banues në Tiranë, për veprat penale “Prodhimi dhe shitja e narkotikëve”, kryer në bashkëpunim, “Prodhimi dhe mbajtje pa leje e armëve, armëve shpërthyese dhe municionit” dhe “Falsifikimi i dokumenteve”;
A. B., 43 vjeç, banues në fshatin Bulgarec dhe R. H., 35 vjeç, banues në Cërrik, për veprën penale “Moskallëzimi i krimit”.
Gjithashtu, në ambientet e magazinës, u kapën në flagrancë 3 shtetase për të cilat nisi procedimi në gjendje të lirë, për veprën penale “Moskallëzimi i krimit”.
Në vijim të hetimeve u identifikua si i përfshirë në këtë veprimtari kriminale dhe u shpall në kërkim shtetasi S. D., 38 vjeç, banues në fshatin Voskop. Gjatë kontrollit në banesën e tij u gjetën të kultivuara 2 bimë narkotike, si dhe sasi të vogla të lëndëve narkotike kokainë dhe kanabis.
Vijon puna për kapjen e këtij shtetasi dhe për dokumentimin e plotë të kësaj veprimtarie kriminale”, njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
