Prokuroria e Krimeve të Rënda, ka zgjeruar rrethin e personave nën hetim për dosjen e dëshmitarit të mbrojtur Ylvi Beqja dhe ish-hotel Vollgën në Durrës.
“Abc News” ka mësuar se veç Emiljano Shullazit dhe të dyshaurve si pjesëtar të bandës së tij, prokuroria po heton edhe familjarë të Lulzim Berishës, i dënuar si kreu i “bandës” së Durrësit, tashmë i liruar nga burgu.
Burimet thonë se për llogari të këtij hetimi, është sekuestruar kjo deklaratë noteriale, që “ABC News” e ka siguruar një kopje, e firmosur në gusht të vitit 2014 nga Ylvi Beqja tashmë me cilësinë e dëshmitarit të mbrojtur dhe motra e Lulzim Berishës.
Sipas dëshmisë së biznesmenit Beqja dhënë në prokurori, e motra e Lulzim Berishës i ka premtuar kthimin dhe regjistrimin e ish-hotel Vollgës në emër të kompanisë arabe, të cilët i përfaqësonte Ylvi Beqja kundrejt shpërblimit prej 500 mijë eurove.
Për të justifikuar kalimin e kësaj shume, pas regjistrimit të pronës, Beqja i ka thënë hetuesve, se motra e Lul Berishës i ka kërkuar të firmos një deklarat noteriale duke pretenduar se parat ia kishte marr borxh ndër vite. Në dëshmi biznesmeni Beqja, thotë se është detyruar të firmos këtë deklaratë, duke pranuar se i kishte marrë para borxh familjes së Lul Berishës fillimisht 300 mijë marka në vitin 1996, një shumë tjetër prej 100 mijë dollarë amerikan në vitin 1998 dhe shumën prej 150 mijë eurove në vitin 2004.
Për kthimin e borxhit me gjithë interesa, Beqja kishte firmosur se do ja kthente deri në fund të muajt tetor të vitit 2014 të gjithë shumën prej 500 mijë eurove. Nëse nuk do ja kthente shumën, e motra e Lul Berishës kishte të drejtë të bllokonte dhe të bëhej pronar e të gjitha pronave e aseteve të tjera në vlerën e 500 mijë eurove, që dispononte Ylvi Beqja.
Shumë e cila duhet të paguhej për 2 muaj e gjysmë nga momenti i nënshkrimit të delaratës. Sipas prokurorisë, për regjistrimin e ish-hotel Vollgës në emër të Ylvi Beqajt i dyshuari Emiljano Shullazi ka kërkuar dhe marrë 30 % të pronës, ndërsa e motra e Lul Berishës ka kërkuar 500 mijë euro për këtë punë.
Për këtë fakt, prokuroria po heton edhe pjesëtarët e familjes së kreut të bandës së Durrësit si bashkëpunëtor në dosjen në ngarkim të Emiljano Shullazit dhe të dyshuarve të tjerë tashmë të arrestuar.
