Bashkia e Tiranës ka vendosur ndërtimin e një këndi lojërash brenda hapësirës së Parkut të Liqenit Artificial. Përveç këndit të lojërave, investimi do të përfshijë edhe një lokal-restorant, i cili pritet të jepet me koncesion. Ndërtimi i lokalit është hapur në shkelje të statutit të parkut. Sipas një dokumenti të publikuar nga Citynews.al, vlera e këtij projekti do të kapë shifrën e 700 milionë lekëve.
Por, ajo që bie në sy në këtë projekt është mungesa e transparencës, lejes dhe studimeve për realizimin e saj. Ky ndërtim nuk është parashikuar në planin zhvillimor të Tiranës dhe nuk ka asnjë plan të detajuar vendor. Gjithashtu, projekti për ndërtimin e këndit të lojërave nuk ka marrë leje ndërtimi dhe nuk rezulton i miratuar formalisht.
Prerja e pemëve për të betonizuar hapësirën brenda parkut të liqenit është në kundërshtim të plotë me statutin e parkut. Kryetari i bashkisë, Erion Veliaj, tha se pemët u prenë pasi ishin të sëmura, por nuk rezulton të ketë asnjë studim për këtë.
Edhe pse erdhi në krye të bashkisë me premtimin se nuk do ta prekte hapësirën e Parkut të Liqenit Artificial, Erion Veliaj, ka vendosur të mos e mbajë premtimin duke ndërtuar brenda parkut me një shifër prej 700 milionë lekë, duke prerë pemët dhe betonizuar parkun, në kundërshtim me ligjin dhe interesin publik./citynews
