Ajo ishte mbretëresha më e njohur e Egjiptit të lashtë, e pavdekësuar për mijëra vjet si një femër joshëse dhe e bukur. Por, megjithë famën e saj, varri i Kleopatrës është një nga misteret e mëdha të pazgjidhura.
Disa besojnë se ajo u varros në Aleksandri, ku lindi dhe sundoi nga pallati i saj mbretëror, një qytet i shkatërruar nga cunami i vitit 365. Të tjerë sugjerojnë që vendi ku ajo u preh mund të ishte rreth 30 milje larg, në tempullin e lashtë të Taposiris Magna, të ndërtuar nga paraardhësit e saj Ptolemaik në Deltën e Nilit.
Tani dy mumje të individëve me status të lartë që kanë jetuar në kohën e Kleopatrës janë zbuluar në Taposiris Magna, një zbulim që po përshkruhet si “sensacional” sepse tregon rëndësinë e një nekropoli që po lidhet me Kleopatrën nga gjetjet e fundit.
Edhe pse dhoma e varrosjes ishte paprekur për 2,000 vjet, mumjet janë ruajtur në gjendje të dobët sepse uji kishte depërtuar. Por provat zbulojnë se ato fillimisht ishin plotësisht të mbuluara me fletë ari, një luks që u jepej vetëm atyre në nivelet më të larta të shoqërisë. Ndoshta këta dy individë kishin bashkëvepruar me vetë Kleopatrën, sugjerojnë arkeologët.
Mumjet janë skanuar me rreze X, duke vërtetuar se janë mashkull dhe femër. Një sugjerim është që ata ishin priftërinj që luajtën një rol kryesor në ruajtjen e fuqisë së faraonëve. Njëri mban një imazh të një brumbullit, që simbolizon rilindjen, pikturuar në fletë ari.
Kleopatra ishte e fundit e një dinastie të pamëshirshme që sundoi mbretërinë Ptolemaike në Egjipt për gati tre shekuj. Megjithatë, nuk është gjetur një varr i vetëm faraonësh Ptolemaik.
Gërmimet në Taposiris Magna drejtohen nga Dr Kathleen Martínez, e cila, pasi punoi atje për më shumë se 14 vjet, është më i bindur se kurrë varri i Kleopatrës do të gjendet aty. Vetëm një përqindje e vogël e sitit të gjerë është hulumtuar.
Në vendin e altarit të tempullit, ku priftërinjtë do t’i bënin sakrefica perëndive, janë zbuluar 200 monedha që mbajnë emrin e Kleopatrës dhe fytyrën e saj.
Kjo “gjetje e jashtëzakonshme” jo vetëm që lidh Kleopatrën drejtpërdrejt me Taposiris Magna, por gjithashtu zbulon një imazh të mrekullueshëm të mbretëreshës, thotë një nga arkeologët. /Opinion.al
