Mbrëmjen e së mërkurës, Policia greke ka zbardhur vrasjen e një 24 vjeçari shqiptar. Vrasja ndodhi në datën 28 maj të këtij viti në lagjen “Patisia” në Athinë. Sipas të dhënave të policisë, vrasja është kryer nga 4 shtetas shqiptar përkatësisht 19,20,dhe 23 vjeç, ndërsa është porositur nga ish e dashura e viktimës, një 24 vjeçare.
Katër të arrestuarit deklaruan se ishin implikuar në vrasjen e 24 vjeçarit, mbas kërkesës së bërë prej 24-vjeçares, tashmë të arrestuar.
Sipas tyre, ajo i kishte kërkuar të afërmve të saj, ta ndihmonin për të shpëtuar prej viktimës, me të cilin kishte prej kohësh një lidhje intime, por gjatë të cilës, viktima e dhunonte dhe keqtrajtonte rregullisht.
E gjendur nën presionin gjithmonë në rritje të ish të dashurit të saj, ajo kërkoi prej të afërmve të saj, që ta largonin, duke ushtruar dhunë fizike.
Pasi e vuri në grackë viktimën, ajo la takim me të në një zonë, ku viktima nuk do të kishte shumë mundësi shpëtimi. Fillimisht katër të arrestuarit e kërcënuan dhe më vonë palët u përballën në një sherr banal, i cili degjeneroi në akte dhune verbale, mes viktimës dhe dhunuesve, tashmë të arrestuar.
Gjatë sherrit, njeri prej tyre nxori thikën duke e lënë të vrarë në vend 24-vjeçarin, trupi i të cilit u dërgua i pa jetë në spitalin e Athinës.
Gjatë ditëve në vazhdim, policia mundi të gjejë provat dhe të vërë në pranga katër të dyshuarit. Ata do të dërgohen në gjykatë nën akuzën e vrasjes me paramendim.
