Është zbardhur shkresa e nënshkruar nga disa deputetë të Partisë Socialiste, të cilët kërkojnë që komisioni i Etikës të marrë masa disiplinore ndaj 6 deputetëve të PD, pas kaosit të shkaktuar në seancën plenare të së hënës.
Në shkresën e grupit të PS thuhet se deputeti Bardhi është konfliktuar me punonjësit e Gardës dhe në një moment ai ka hedhur një karrige në drejtim të tyre duke dëmtuar rëndë njërin prej gardistëve rëndë në dorë.
Për deputetin Noka thuhet se ndezi dy flakadanë duke i drejtuar ato drejt drejtueses së seancës, kryeministrit dhe anëtarëve të Këshillit të Ministrave.
Ndërsa për deputetin Bledjon Nallbati thuhet se nga vendi ku ulet mori flakadanë nga çantat e deputeteve Sorina Koti dhe Albana Vokshi të vendosura mbi tavolina dhe i ndezi ato duke shkaktuar kaos në sallë.
“Deputeti Bardhi konfliktohet me punonjësit e sigurisë në sallën plenare dhe në një moment ai hedh një karrige në drejtim të tyre duke dëmtuar rëndë njërin prej gardistëve në dorë. Deputeti Flamur Noka mori karriget te cilat ishin vendosur si barrikadë në një nga hyrjet e sallës plenare dhe i vendosi mbi foltore duke e bllokuar atë.
Deputeti Noka mban dy flakadanë duke i drejtuar ato drejt drejtueses së seancës, kryeministrit dhe anëtarëve të Këshillit të Ministrave. Deputeti Bledjon Nallbati nga vendi ku ulet merr flakadanë nga çantat e deputeteve Sorina Koti dhe Albana Vokshi të vendosura mbi tavolina dhe i ndez ato duke shkaktuar kaos në sallë.
Situata agravoi edhe me shumë në momentin kur deputeti Bledjon Nallbati nxjerr nga çanta e deputetes Albana Vokshi një kuti e cila mori flakë menjëherë, gjithashtu i ndihmuar edhe nga deputeti Flamur Hoxha, këtu kuti e vendosi ne tavolinën përpara duke dëmtuar pajisjen elektronike të votimit, duke rrezikuar që flakët të përhapeshin në sallë”, thuhet ndër të tjera në këtë shkresë.
Kujtojmë se PS ka kërkuar përjashtimin për 6 deputetë, konkretisht Flamur Noka; Bledion Nallbati; Gazment Bardhi; Albana Vokshi; Sorina Koti dhe Flamur Hoxha.
