Pas vetëvrasjes së cilësuar nga Ministria e Brendshme të Shkëlzen Qordjas në garazhin e Gardës së Republikës, ekspertiza mjeko-ligjore konfirmon për ABC News se 31-vjeçari kishte marrë vetëm një plumb kokë në pjesën e lobit temporal.
Ndërkohë, pranë trupit të viktimës Qordja, me detyrë shofer i ministrit të Brendshëm Fatmir Xhafaj, u gjetën 3 gëzhoja të qitura nga arma automatike tip “MP5”. Gëzhojat u dërguan pranë laboratorit të Policisë Shkencore, për të parë nëse kanë apo jo gjurmë gishtërinjsh të vetë viktimës apo të ndonjë personi tjetër. Një tjetër provë e rëndësishme që iu bë viktimës ishte edhe gjetja e faktorëve plotësues të qitjes. Kështu, ekspertët e kriminalistikës kërkuan për mbetje baruti në rrobat e Qordjas, e po kështu edhe në lëkurë.
Sipas të dhënave zyrtare, arma automatike u gjet në dorën e djathtë të viktimës me pozicionin “qitje me breshëri”. Grupi hetimor ka konstatuar se viktima ishte i ulur në sediljen e shoferit të një mjeti të parkuar në garazhin për mjetet e Ministrisë, i cili u gjet i mbyllur nga brenda. Me gjithë dyshimet e vetëvrasjes, grupi hetimor po punon për të qartësuar shkaqet dhe rrathanat e ngjarjes. Shkëlzen Qordja kishte nisur punë në Gardën e Republikës në Mars të vitit të kaluar. /abcnews.al
