Kryetari i Partisë Demokratike, Lulzim Basha, u dënua sot nga Gjykata e Tiranës me 50 mijë lekë gjobë, për shpifje kundër deputetit socialist Taulant Balla.
Balla e paditi Bashën, me pretendimin se ky i fundit kishte shpifur në Parlament kur tha se kreu i grupit parlamentar socialist ishte porositësi i 3.4 milion eurove që do të vinin me dy makina Toyota Yaris.
Siç shikohet nga zbardhja e vendimit të siguruar nga gazeta “Panorama”, gjykatësi është mjaftuar vetëm me nenin për shpifje në dënimin e z. Bashas si edhe gjobën.
Ndërkohë që mungon verifikimi i barrës së provës, që provon shpifjen e z. Basha.
Më 24 qershor, vetëm disa ditë pasi Basha kishte akuzuar Ballën nga foltorja e Parlamentit si porositësin e 3.4 milion euro që do të vinin me Toyota Yaris, makinat me euro u kapën në Portin e Durrësit.
VENDIMI
Në emër të Republikës
Gjykata e Rrethit Gjyqësor Tiranë e përbërë nga gjyqtar Gerd Hoxha asistuar prej sekretares gjyqësore Znj. Silvi Xhakolli sot më datë 21 janar 2019, me pjesëmarrjen e Prokurorisë së Rrethit Gjyqësor Tiranë, përfaqësuar nga prokurori Z. Agron Gjana, mori në shqyrtim në seancë gjyqësore publike, kërkesën penale me nr. 208 akti, me;
Viktima akuzuese: Taulant balla, i biri i Kasëm dhe i Fatime, i dtl. 12.08.1977,
lindur në Librazhd dhe banues në Tiranë Rr. “Reshit Petrela”, shqiptar, i martuar, arsimi i lartë, i padënuar, përfaqësuar në gjykim nga Av. Genjtna Rumano.
I akuzuar: Lulzim Basha, i biri i Xhelal dhe i Remzije, i dtl.12.06.1974, lindur dhe banues në TIranë, Rr “Demor Gashi”, Nr.3, shqiptar, i martuar, i padënuar, përfaqësuar në gjykim nga Av.Ivi Kaso dhe Av.Gazmend Bardhi.
Palë e interesuar: Prokuroria e Rrethit Gjyqësor Tiranë përfaqësuar në gjykim nga prokurori z. Agron Gjana.
Akuzuar: Për veprën penale të “Shpifjes” parashikuar nga neni 120/2 i K.Penal.
Gjykata, në përfundim të shqyrtimit gjyqësor, pasi administroi provat shkresore; dëgjoi viktimën akuzuese Z. Taulant Balla që kërkoi deklarimin fajtor dhe dënimin e të akuzuarit Z. Lulzim Basha për kryerjen e veprës penale të “Shpifjes” së kryer botërisht, parashikuar nga neni 120/2 i KP’
dëgjoi mbrojtësit e të akuzuarit Z.Lulzim Basha që kërkuan pafajësi ose pushimin e gjykimit;
…
nga neni 120/2 i K.Penal dhe në bazë të këtij neni, dënimin e të akuzuarit me 50 000 (pesëdhjetëmijë) lekë gjobë. Në aplikim të nenit 34 të KP, i akuzuari Lulzim Basha do ta paguajë këtë gjobë brenda një afati prej 6 muajsh, nga dita që ky vendim do të marrë formë të prerë.
Shpenzimet procedurale në ngarkim të të akuzuarit. Kundër këtij vendimi mund të bëhet ankim, brenda 15 ditëve nga e nesërmja e shpalljes së tij, në Gjykatën e Apelit Tiranë.
