Sipas Prokurorisë së Përgjithshme, Petraq Dashi, i dyshuar si ndërmjetës i afer ës korruptive prej 50 mijë eurosh në Gjykatën e Lartë, i ka drejtuar këtë pyetje në telefon bashkëshortit të gjyqtares Majlinda Andrea paraditen e 11 korrikut. Biseda e përgjuar është një nga provat kryesore të Prokurorisë në hetimin kundër gjyqtares Andrea, bashkëshortit të saj, të dyshuar si të përfshirë në skemën korruptive për dhënien e një vendimi në favor të palës së interesuar.
Sipas dosjes së Prokurorisë, përgjigjja e bashkëshortit të gjyqtares ka qenë: “Silli që sot. Sa më shpejt, aq më mirë, se është vapë dhe ikin këta”. Rreth orës 19:15 të po kësaj date, i dyshuari Dashi është fotografuar dhe filmuar nga agjentët e Forcës Operacionale teksa ka takuar në një lokal në kryeqytet bashkëshortin e gjyqtares.
Ai i ka lënë Odhise Andreas në dorë një qese të mbështjellë me letër, ku dyshohet të kenë qenë 50 mijë eurot. Për Prokurorinë, ky fakt provohet nga një tjetër bisedë e përgjuar e të dyshuarit Dashi, e administruar në dosje. Pas takimit me Odhise Andrean, i dyshuari Dashi ka telefonuar një familjar të tij, të cilit i ka thënë:
“Sapo dorëzova atë porosinë dhe pas dy ditësh do të dalë vendimi”. Përgjimet telefonike dhe vëzhgimet ambientale janë provat kryesore për rastin korruptiv që dyshohet të jetë konsumuar nga një anëtar i Gjykatës së Lartë.
DOREZIMI I PARAVE
Gazeta “Panorama” ka siguruar pjesë nga dosja e Prokurorisë së Përgjithshme, ku zbardhen veprimet e kryera nga të dyshuarit në 11 korrik. Në këtë ditë, sipas Prokurorisë, mes të dyshuarve Ilia Çabiri, Eleni Lino është nënshkruar një deklaratë noteriale, ku ata i njohin një borxh shtetasit Petraq Dashi. Në të njëjtën ditë është ekzekutuar edhe dorëzimi i pakos ku dyshohet të kenë qenë 50 mijë eurot nga ana e të dyshuarit Dashi te bashkëshorti i gjyqtares, Odhise Andrea.
“Nga hetimet e kryera ka rezultuar se në datën 11.07.2016, shtetasi Ilia Çabiri, si dhe personi me emrin Eleni kanë shkuar në qytetin e Fierit dhe janë takuar me shtetasin Petraq Dashi. Rreth orës 10:45 të tre personat e mësipërm kanë shkuar në zyrën e Noteres xxxx ku kanë kryer veprime noteriale, ku dyshohet se kanë nënshkruar deklaratat noteriale për njohjen e borxhit ndaj shtetasit Petraq Dashi. Më pas, rreth orës 12:00, shtetasi Petraq Dashi ka shkuar në pikën e transfertave monetare ‘xxxx’, ku ka takuar një person tjetër që mbante një çantë të zezë në dorë. Të dy këta të fundit kanë hyrë në pikën e transfertave ‘xxxx’ dhe në momentin që shtetasi Petraq Dashi ka dalë nga ky ambient, ka pasur në dorë një qese të mbështjellë pjesërisht me një letër të bardhë, të cilën e ka marrë me vete.
Në datën 11.07.2016, rreth orës 19:15, shtetasi Petraq Dashi është takuar në Tiranë me shtetasin Odhise Andrea, ku së bashku janë ulur në ambientet e jashtme të lokalit ‘xxxx’. Në momentin që shtetasi Petraq Dashi ka shkuar në takim, ka pasur me vete, përveç çantës së tij të dorës, edhe një qese të mbështjellë me letër, të njëjtën që ka pasur në dorë edhe në momentin që ka dalë nga zyra e transfertave të parave në Fier. Në momentin që ata janë ngritur nga tavolina ku ishin ulur, qesen e mësipërme shtetasi Petraq Dashi ia ka dhënë shtetasit Odhise Andrea, i cili e ka mbajtur në dorë në mënyrë të dukshme dhe më pas është larguar për në banesën e tij”, thuhet në dosjen e Prokurorisë.
Marrë nga Panorama-Armand Bajrami
