Zbulimi i trafikut të kokainës, që solli prangosjen e futbollistit durrsak Guido Tepshi dhe familjarëve të tij, u bë gjatë kohës kur policia italiane po hetonte vrasjen e një shqiptari 3 vjet më parë.
Ngjarja ndodhi në Fucecchio të Firences, ku viktimë e sulmit më armë zjarri mbeti 31-vjeçari Klaudio Ruçaj. Mediat italiane i kanë bërë jehonë arrestimeve të një grupi prej 25 personash në disa shtete. Operacioni i koduar “Ricarica 2013” bëri që në Shqipëri të mbërrinin 6 fletë-arreste, mes tyre e futbollistit 24-vjeçar, bashkë me të atin biznesmen, Edmond Tepshi dhe 4 të njohur të tjerë të tyre: Luan Tepshi, Artur Tepshi, Kastriot Dyrmishi dhe Laert Teneqexhi.
Sipas veprimeve të kryera nga ana e grupit hetimor të ngritur për këtë çështje, të gjithë personat e arrestuar në Shqipëri e Itali, bashkë me të tjerë në kërkim, kanë kryer trafik kokaine nga korriku i vitit 2013 e deri në qershor të vitit 2014. Mësohet se bëhet fjalë për një sasi prej 15 kilogramësh kokainë, e cila kalonte nga Holanda në Itali.
Policia e Firences nisi hetimet fillimisht për vrasjen e Klaudio Ruçajt, që sipas saj ndodhi nga përplasja për kontrollin e prostitucionit. Shumë të dyshuar dhe të njohur me personat që mendohej se kishin lidhje me viktimën apo me të akuzuar si autorët e krimit, u vunë në përgjim nga ana e policisë. Ndonëse vrasja nuk është zbuluar ende sot, policia ra në gjurmët e një rrjeti që trafikonte drogën e shtrenjtë. Menjëherë nisi hetimi për rastin e drogës, duke kontrolluar të gjithë veprimtarinë e të implikuarve.
Në përgjimet e kryera falë bashkëpunimit të policive të disa shteteve, futbollisti Tepshi, i diplomuar për Drejtësi, është regjistruar biseda ku ai thotë se donte të bëhej punonjës Policie e në të ardhmen të regjistrohej në shkollën e Magjistraturës. Ky fakt u ka bërë përshtypje hetuesve, të cilët e konsiderojnë babain e të riut, Edmond Tepshi, si kreun e grupit të trafikut të drogës. Lënda narkotike vinte në zonën e Toskanës nga Holanda e më pas përgatitej në sasi të vogla për t’u shpërndarë në qytete të tjera italiane.
Mediat e shtetit fqinj thonë se, bazuar në të dhënat e hetimit, anëtarët e bandës që jetonte në Itali, bënte një jetë modeste, pa shpenzime të tepërta, ndërsa ndryshonte sjellja për ata që jetonin në Shqipëri. Gjatë një rasti tjetër përgjimi, njëri prej anëtarëve më të vjetër të grupit mësohet të ketë thënë: “Trafikun e drogës nuk e shpikëm ne. Ka qenë gjithmonë dhe do të jetë në të ardhmen. Dikush duhet të merret me të e kështu po e bëjmë ne”./Panorama
