Vangjush Dako, nuk ka qenë i vetmi që është marrë në pyetje nga Prokuroria e Krimeve të Rënda për hetimet që po zhvillohen mbi zgjedhjet e vitit 2017.
Sipas raportimeve të Tv Klan të gjithë drejtuesit e shtabit elektoral të Partisë Socialiste që u angazhuan në fushatë elektorale në Qarkun e Durrësit, apo edhe zyrtarë lokalë po pyeten nga organi i akuzës.
Prokurorët Vladimir Mara dhe Dritan Premçi po marrin dëshmitë e tyre, ndërsa konfirmohet se pyetja e këtyre personave është bërë në këtë moment për shkak të përfundimit të zbardhjes së disa dhjetëra CD-ve të reja me përgjime nga ajo që njihet si Dosja 339.
Burimet janë tepër të rezervuara për të bërë publike përmbajtjen e tyre, por sqarohet se janë të dhëna të vlefshme të cilat mund t’i japin një tjetër rrjedhë hetimit. Përgjimet e kësaj dosje gjatë operacion “Volvo 4” çuan në shkatërrimit e 4 grupeve kriminale që merreshin me trafikun e drogës dhe tjetërsimin e pronave në bregdet. Ndërsa hetimi për blerjen e votave në Durrës u veçua në një tjetër dosje, 339/1/.
Sipas burimeve, kryebashkiaku i Durrësit, në një rrëfim prej pesë orësh ditën e enjte ka treguar si është njohur me vëllezërit Astrit dhe Altin Avdylaj, me të cilët ka pasur komunikim gjatë dhe pas fushatës elektorale. Mësohet se Dako ka mohuar të ketë dijeni mbi blerjen e votave, ndërsa ka sqaruar se persona të ndryshëm mund tu kenë ofruar para votuesve, por ai nuk qenë në dijeni dhe nuk e aprovuar asnjëherë këtë gjë.
Në përgjimet e bëra publike deri më tani Vangjush Dako është regjistruar duke folur një herë me Altin Avdylin, i njohur ndryshe si “Niçja”./Opinion.al
