TIRANE- Ministrja e Inovacionit Milena Harito që ka në varësi edhe Departamentin e Administratës Publike njofton deputetët se si duhet të veprojnë për të punësuar militantët e PS-së.
Lapsi. al ka zbardhur komunikimin me email mes Haritos dhe Taulant Ballës, bërë rreth një vit më parë.
Sipas këtij email-i Balla njofton deputetin Tom Doshi, ministrat Mimi Kodheli, Saimir Tahiri, Arben Ahmetaj, zv/ kryeministrit Peleshi, deputetëve Tom Doshi, Etjona Hoxha, Fidel Ylli, Ulsi Manja, Ben Blushi për pozicionet e lira që Drejtoria e Administratës Publike ka shpallur sipas qarqeve dhe manualit për të aplikuar online.
“Per kete qellim nevojitet qe ne nivel qarku dhe rrethi ne zyrat qendrore elektorale te vendosen persona pergjejgjes qe te administrojne dhe te instruktojne njerezit tane qe te aplikojne”, thuhet në emailin e Taulant Ballës. Emaili mban datën 11 shtator 2014 dhe rekomadimet e Ballës për punësimet duket se mund të jenë në funksion të zgjedhjeve lokale të qershorit 2015.
Më 30 dhjetor të 2014 ministrja Harito u drejtohet të njëjtëve persona me një tjetër email.
Në të thuhet: “Të nderuar. Ne vazhdim te shkembimit me Taulant Ballen si me poshte, dhe per shkak te numrit të ulët të fituesve në konkurset e DAP, lutem më transmetoni emrat e 1-3 personave për qark të cilët do të instruktohen për procedurën e aplikimit, në mënyrë që të kenë mundësi të ndihmojnë këdo që kërkon ndihmë pranë zyrave elektorale.”
