Të tjera detaje janë zbardhur lidhur me operacionin e madh të Policisë së Shtetit, i cili është zhvilluar që nga mesi i ditës së sotme dhe ka vijuar deri në orët e mbrëmjes.
Sipas informacioneve, personat e ndaluar kanë qenë në qytetin e Elbasanit dhe atë të Lushnjes dhe pjesëtarë të grupit të Laert Haxhiut.
Sipas informacioneve, personi që ka bashkëpunuar me drejtësinë është Artan Tafani, i arrestuar pak ditë më parë nga Policia e Lushnjes pasi ishte shpallur në kërkim për grabitjen e një exchange në zonën e Astirit në Tiranë
Ai ka pranuar të rrëfejë gjithçka duke nxjerrë zbuluar një grup vrasësish me pagesë, të përfshirë në disa ngjarje kriminale dhe të drejtuar nga Laert Haxhiu, i cili njihet për një sërë krimesh të kryera në qytetin e Lushnjes, ku mbi të rëndojnë akuzat për vrasjen e tre personave.
Sakaq mësohet se urdhër arrestet janë lëshuar nga Prokuroria e Elbasanit, ndërsa më pas dosja do i kalojë SPAK-ut për procedura të tjera hetimore.
Laert haxhiu është i dënuar me 18 vite burg nga gjykata e Lushnjes për atentatin në 2016 ndaj nipit të Aldo Bares dhe një personi tjetër.
Po ashtu, është në proces gjyqësore nga SPAK për atë që njihet si masakra e Lushnjes në shtator të 2017 ku humbën jetën Jurgen Hoxha dhe Zamir Latifi, ndërkohë shënjestër ishte Xhulio Shkurit i cili shpëtoi pa u dëmtuar.
