E ftuar në emisionin “Top Story” të Grida Dumës, tashmë në rolin e saj të ri si drejtoresha e Agjencisë Kombëtare të Turizmit, Zana Çela, foli për një ngjarje të rëndësishme, lançimin e para pak ditëve në Tiranë, të kalendarit të parë në Shqipëri, të eventeve turistike dhe të aplikacionit TEA (Tourism Events of Albania) që e sjell edhe në digjital këtë kalendar, i cili mund të shkarkohet falas si në App Store edhe në Play Store.
Tashmë që gjithçka po digjitalizohet dhe duke pasur parasysh se sa në qendër të vëmendjes ka qenë turizmi shqiptar, një aplikacion i tillë ka ardhur në momentin e duhur, si një kërkesë e vazhdueshme e vizionit të qeverisë dhe Ministrisë së Turizmit dhe Mjedisti. “Krijimi i një kalendari digjital do t’i japë mundësi çdo turisti shqiptar apo të huaj, në çdo cep të globit, të krijojë ndoshta një lidhje edhe më të fuqishme, edhe më të thellë emocionale, të paharruar me Shqipërinë. Në këtë kalendar, ne mblodhëm nga çdo cep i Shqipërisë mbi 1110 evente, duke filluar nga festat lokale të fshatrave malorë apo bregdetarë, deri te festat dhe eventet në qytete e kryeqytet. Pasi krijuam këtë bazë të dhënash strukturuam formatet e eventeve që iu përshtaten audiencat turistike”, u shpreh drejtoresha e AKT-së, Çela duke theksuar se s’ka qene aspak një proces i lehtë, por që u arrit megjithatë në një kohë të shpejtë.
Kalendari digjital është përqendruar edhe tek harta e zgjeruar gjeografike, ku eventet turistike janë shpërndarë në të gjitha destinacionet turistike, që nga vija bregdetare, te sheshet e qyteteve, qendrat e fshatrave, por edhe në sitet e trashëgimisë kulturore “për të ndriçuar”, siç tha Çela, “me evente çdo amfiteatër, kala a muze.”
Falë TEA-s, turistët do të shijojnë krahas natyrës, maleve, detit e kulinarisë, edhe eventet kulturore e artistike, duke marrë kështu më të mirën nga pushimet e tyre. Në aplikacion do të përfshihen kategori të ndryshme si Art Fest, Trashëgimi Kulturore, Festivale Muzikore, Sport, Koncerte, Folklor, Festa Lokale, Arte Pamore, Agroturizëm e Kulinari dhe Teatër.
Çdo event brenda aplikacionit do të ketë faqen e tij të dedikuar me informacion të detajuar dhe përdoruesit do të njoftohen për eventet e tyre të preferuara kur data e tyre të afrojë. TEA ka edhe disa butona të tjerë të dobishëm për të përmirësuar përvojën e përdoruesëve të saj. Vetëm me një trokitje, butoni “Vendndodhja” do t’i drejtojë ata në vendin e ngjarjes. Butoni “Kalendari” e ruan ngjarjen në kalendarin personal të përdoruesit, duke u siguruar që ai të mos humbasë asnjë event për shkak të harresës në kohë. Dhe për kë dëshiron t’i ndajë emocionet që falin eventet e turizmit, butoni “Share” u lejon përdoruesëve të përhapin me lehtësi fjalën te miqtë dhe familjet e tyre.
Ndër të tjera, Çela foli edhe për marrjen e detyrës si drejtoreshë e Agjencisë Kombëtare të Turizmit, një përgjegjësi dhe sfidë e madhe. “E kam menduar mirë përpara se të pranoj të drejtoj AKT-në, pasi kjo agjenci ka si mision kryesor promovimin, kryesisht jashtë vendit, por edhe brenda vendit, të Shqipërisë turistike. Por qeveria shqiptare vendosi që kjo agjenci të luante dhe një rol tjetër po aq të rëndësishëm: krijimin, koordinimin dhe organizimin e Kalendarit Kombëtar të Eventeve të Turizmit Kulturor, Sporteve dhe Traditës. Sepse tashmë vizioni i qeverisë është që Shqipëria turistike të brendohet përmes trashëgimisë kulturore dhe eventeve multiart”, u shpreh Çela në “Top Story”.
