Nga Eduard Zaloshnja
Palët në Tiranë vazhdojnë debatin nëse është vetting-u kusht kryesor i çeljes së negociatave për antarësimin e Shqipërisë në BE, apo zgjedhjet e qershorit; nëse Shqipërisë i kërkohet 1 kusht e 5 prioritete, apo 2 kushte e 7 prioritete.
Por e kanë të kotë. Edhe sikur Shqipëria të plotësojë 15 kushte e 17 prioritete, çelja, dhe ç’është më e rëndësishme, vazhdimi i negociatave për antarësimin e Shqipërisë në BE do të varet nga gjërat që do të ndodhin në Europë e në botë në vitin në vazhdim.
Çelja, dhe ç’është më e rëndësishme, vazhdimi i negociatave për antarësimin e Shqipërisë në BE mund të shtyhen për në kalendat greke, nëse Marine Le Pen fiton zgjedhjet presidenciale në Francë ose nëse François Fillon i fiton ato duke premtuar moszgjerimin e BE-së.
Çelja, dhe ç’është më e rëndësishme, vazhdimi i negociatave për antarësimin e Shqipërisë në BE mund të shtyhen për në kalendat greke, nëse Geert Wilders fiton zgjedhjet parlamentare në Hollandë ose nëse Mark Rutte i fiton ato duke premtuar moszgjerimin e BE-së.
Çelja, dhe ç’është më e rëndësishme, vazhdimi i negociatave për antarësimin e Shqipërisë në BE mund të shtyhen për në kalendat greke, nëse Frauke Petry fiton zgjedhjet parlamentare në Gjermani ose nëse Angela Merkel i fiton ato duke premtuar moszgjerimin e BE-së.
Çelja, dhe ç’është më e rëndësishme, vazhdimi i negociatave për antarësimin e Shqipërisë në BE mund të shtyhen për në kalendat greke, nëse Beppe Grillo / Matteo Salvini fiton zgjedhjet parlamentare në Itali ose nëse Renzi/Berlusconi i fiton ato duke premtuar moszgjerimin e BE-së.
E kështu, nëse-të mund të vazhdojnë me rradhë në Europë, sepse mjafton vetoja e njërit prej 27 shteteve anëtare, për të bllokuar procesin e negociatave për futjen në BE (Turqia ka aplikuar për futjen në BE qysh në vitin 1987 dhe i ka filluar qysh më 2005 negociatat që s’po mbarojnë kurrë).
Duke shkuar përtej shteteve europiane, çelja, dhe ç’është më e rëndësishme, vazhdimi i negociatave për antarësimin e Shqipërisë në BE mund të shtyhen për në kalendat greke, nëse Ballkani përdoret nga Donald Trump-i si një çip në tryezën e pokerit gjeostrategjik që ai pritet të luajë me Putin-in në muajt e ardhshëm
