Ka nisur sot seanca në Kolegjin e Posaçëm të Apelimit për kreun e Gjykatës së Lartë, Xhezair Zaganjori.
Gjatë seancës Komisioneri Publik Florian Ballhysa tha se nuk ka ndryshuar asnjë rrethanë përsa i përket shkaqeve të ankimit të tij ndaj vendimit të KPK për të konfirmuar në detyrë Zaganjorin.
“ Të gjitha shkaqet e ankimit duhet të merren në shqyrtim”, raporton komisioneri, duke pretenduar se ka pasaktësi në deklarimet dhe krijimin e pasurisë së kreut të Gjykatës së Lartë.
Sa i përket 23 provave shtesë të paraqitura nga Zaganjori, në veçanti një deklaratë noteriale e 4 bashkëpronarëve dhe bashkëshorteve të tyre ku deklarohet fakti se 4 çiftet kanë kontribuar në ndërtimin e një godine me 5 kate, komisioneri shprehet se ato “nuk përbëjnë ndonjë vlerë të shtuar, pasi subjekti nuk ka arritur të dokumentojë vlerën e ndërtimit të godinës, ose vlerat e përfituara nga qiraja me British Council dhe pagimet e taksave”.
Një koment tjetër i Komisionerit Publik Ballhysa ishte se Zaganjori nuk arrin të justifikojë “me burime të ligjshme kursimet dhe shpenzimet e kryera për shkollimin e të birit në Gjermani”. /Opinion.al
